Қазақ-қырғыз шекарасында тағы бір көлік өткізу бекеті салынады
АСТАНА. KAZINFORM – Қырғыз Республикасы мен Қазақстан шекарасында тоғызыншы арнайы өткізу бекеті салынады. Көлік министрі Марат Қарабаев екі ел Үкімет басшыларының елордадағы кездесуінен кейін осында мәлімет берді.
- Былтыр екі арадағы жүк тасымалының көлемі 2,4 млн тоннаға жеті. Бұл 2023 жылмен салыстырғанда 19 пайыз артық. Осы саланы әрі қарай дамыту үшін арнайы рұқсат беру құжаттарын шілде айына дейін электронды форматқа өткіземіз деп келісіп отырмыз. Бұл автомобиль жолы арқылы жүк тасымалын арттырады, - деді ол.
Сондай-ақ, ол екі ел шекарасындағы өткізу бекеттерін жаңғырту, күрделі жөндеу мәселелері күн тәртібінде тұрғанын айтты.
- Қазақстан тарабынан биыл Бесағаш арнайы өткізу бекетін толық модернизациядан өткіземіз. Алдағы сәуір айында жұмыс басталады. Оған қоса Сортөбе өткізу бекетінде ауыр жүк тасымалдайтын көліктерді өткізетін орын жоқ. Сол жерде орташа жөндеу өткізіп, мамыр айынан бастап ол жақта да ауыр жүк тасымалдайтын көліктерді өткізе бастаймыз. Сондай-ақ, жаңа тоғызыншы өткізу бекетін ашу мәселесін талқылап жатырмыз. Оның аясында Ақсу-Камышановка бағытында жолаушылар мен жүк тасымалын өткізетін жаңа бекет іске қосылады. Ол үшін өз тарабымыздан, биыл тиісті құжаттарды әзірлеп, келесі жолы құрылысты бастаймыз деп жоспарлап отырмыз, - деді Марат Қарабаев.
Еске салсақ, Көлік министрі Марат Қарабаев Үкімет отырысынан кейін өткен баспасөз мәслихатында Алматының айналма жолымен жүру ақысы неге қымбаттағанын түсіндірген еді.
