Қазақ спортшыларын осы аптада қандай жарыстар күтіп тұр

АСТАНА. KAZINFORM — Қазақ спортшыларын 24 ақпан мен 2 наурыз аралығында қандай жарыстар күтіп тұрғаны белгілі болды.

ҚР Спорт комитетінің хабарлауынша, осы аптада қазақ спортшылары бірқатар маңызды жарыста бақ сынап, өз шеберліктерін көрсете алады.

Нақтырақ айтсақ, 24 ақпан — 9 наурыз аралығында шаңғымен тұғырдан секіруден әлем чемпионаты өтеді. Онда ел намысын 4 отандасымыз қорғайды. Аталған бәсеке Норвегияның Тронхейм қаласында өтеді.

24 ақпан — 3 наурыз аралығында Мажарстанның Дебрецен қаласында мәнерлеп сырғанаудан жасөспірімдер арасындағы әлем чемпионаты өтеді. Әлемдік додаға ел құрамасынан 2 спортшы қатысады.

23 ақпан — 7 наурыз аралығында Швецияның Эстерсунд қаласында биатлоннан жасөспірімдер мен жастар арасындағы әлем чемпионаты өтпек. Онда аталған біріншілікке 11 отандасымыз сынға түсетін болады.

24-28 ақпан аралығында спорттық және жауынгерлік самбодан Қазақстан чемпионаты жалауын көтермек. Ақтау қаласында өтетін ішкі біріншілікте 17 өңірден 110 спортшы бақ сынайды деп жоспарланып отыр.

25-28 ақпан аралығында Астана қаласында қоян-қолтық ұрыстан ел біріншілігі өтеді. Чемпионатқа еліміздің барлық өңірінен 400 спортшы қатысады деп күтілуде. 

26 ақпан — 2 наурыз аралығында шорт-тректен жасөспірімдер арасындағы әлем чемпионатының алауы желбірейді. Канаданың Калгари қаласында өтетін байрақты бәсекеде ел намысын 8 спортшы қорғамақ.

26-27 ақпан аралығында еркін күрестен Muhamet Malo халықаралық рейтингтік турнирі өтеді. Албанияның Тирана қаласында өтетін додаға Қазақстан құрамасынан 10 балуан ел намысын қорғайды.

26 ақпан — 4 наурыз аралығында Франция астанасы Парижде көркем жүзуден Әлем кубогі (1 кезең) өтеді. Бұл бәсекеде Қазақстаннан 9 спортшы сынға түспек.

26-28 ақпан аралығында Астана қаласында Армрестлингтен Қазақстан чемпионаты өтпек. Сайысқа 17 өңірден 300 спортшы қатысады. 

28 ақпан — 6 наурыз аралығында Италияның Тарвизио қаласында тау шаңғысы спортынан жасөспірімдер арасындағы әлем чемпионатының жалауы желбірейді. Онда ел намысын 2 спортшы қорғайды.

1-3 наурыз аралығында Германияның Оберхоф қаласында шаңғымен тұғырдан секіруден FIS кубогі өтеді. Аталған бәсекеде 4 отандасымыз бақ сынайды.

1-7 наурыз аралығында Шымкент қаласында пара садақ атудан ел чемпионаты өтпек. Ішкі біріншілікке әр өңірден 60 спортшы қатысады деп күтілуде.

Бұған дейін батуттағы гимнастикадан ел құрамасы Бакуде күміс медаль еншілегенін хабарлаған едік.

Ал өткен аптада қазақ спортшылары төмендегідей көрсеткіштерге қол жеткізді:
Мәнерлепсырғанау: Оңтүстік Кореяның Сеул қаласында өткен төрт құрлық чемпионатында Михаил Шайдоров топ жарды. Отандасымыз қоссайыста 285.10 ұпай жинады. Осыдан дәл 10 жыл бұрын марқұм Денис Тен де Сеул төрінде чемпион атанған еді.
Спорттықгимнастика: Германияның Котбус қаласында мәресіне жеткен Әлем кубогінің бірінші кезеңінде Милад Карими алтын медаль жеңіп алды. Еркін жаттығудың финалында ол 14.133 ұпай жинады.
Конькименжүгіру: Польшаның Томашув-Мазовецк қаласындағы Әлем кубогі кезеңінде Евгений Кошкин 500 метр қашықтықта үздік шықты. Қазақстан ең кейінгі рет Әлем кубогі кезеңінде алтынды 2011 жылы командалық спринтте жеңіп алған еді. Сондай-ақ Қазақстан әйелдер құрамасы командалық сында үшінші орын алды.
Нысанакөздеу: Таиландтағы Азия кубогінде ұлттық құрама спортшылары 12 алтын, 9 күміс, 4 қола медальмен жалпыкомандалық есепте 1-орынды иеленді.
Садақату: Таиландтағы Азия кубогі кезеңінде Ұлттық құрама спортшылары үш күміс медаль олжалады.
Дзюдо: Польша астанасы Варшавадағы Еуропа кубогінде спортшыларымыз 1 алтын, 1 күміс медаль жеңіп алды. Ерлер арасындағы 60 кг дейінгі салмақтың финалында екі отандасымыз Шерзод Давлатов пен Бақытжан Аманның жолы түйісіп, Шерзодтың мерейі үстем болды.
Каратэ: Біріккен Араб Әмірліктерінің Фуджайра қаласында өтіп жатқан жастар арасындағы А сериясы жарысында Қазақстан командасы 8 жүлде жеңіп алды. Фуджейрадағы дәстүрлі жарыс бүгін аяқталады.
Батуттағыгимнастика: Қазақстан құрамасы Әзербайжанның Баку қаласында өткен Әлем кубогі кезеңінде күміс медаль еншіледі.