Қазақстан Арменияға Орталық Азиямен байланысты нығайтуға мүмкіндік бере алады – сарапшы
АСТАНА. KAZINFORM – 27 наурызда Арменияның Сыртқы істер министрі Арарат Мирзоянның Қазақстанға алғашқы ресми сапары өтті, деп хабарлайды Kazinform агенттігінің меншікті тілшісі.
Мемлекет басшысы Қасым-Жомарт Тоқаев Арменияның Сыртқы істер министрін қабылдау барысында екі ел президенттерінің былтыр Қазақстан мен Арменияға жасаған сапарлары өзара қарым-қатынасты жан-жақты дамытуға серпін бергенін атап өтті.
А. Мирзоянның Қазақстанға сапарындағы келіссөздер барысында екіжақты ынтымақтастықтың сауда-экономикалық бөлігі және өңірлік транзиттік әлеуетті дамыту мәселелері қозғалды.
APRI Армения қолданбалы саяси зерттеулер институтының ғылыми қызметкері Сергей Мельконянның айтуынша, Қазақстан мен Армения арасындағы екіжақты қарым-қатынасты дамытудың күн тәртібі айтарлықтай кең, яғни тікелей әуе қатынасы мен тауар айналымын ынталандырудан бастап екі елдің транзиттік әлеуетін арттыруға дейін.
— Менің ойымша, қабылданған сауда-экономикалық қатынастарды дамытудың 2024-2025 жылдарға арналған жол картасы қарқынды өзгерістер жағдайында қазірдің өзінде толықтыруларды қажет етеді. Белгіленген бағыттар бойынша күн тәртібі сапалы түрде толықтырылғаннан кейін, стратегиялық әріптестік туралы айтуға болады. Қарым-қатынастың дәл осы деңгейі дамудың бағдары болуы тиіс. Ал Арменияның мүддесіне тоқталсақ, Қазақстан Арменияға Орталық Азия өңірімен байланыстарды нығайтуға мүмкіндік бере алады. Ереван үшін Астана аймақтағы негізгі серіктес саналады. Жоғары деңгейдегі тығыз үйлестірусіз бұл ынтымақтастықтың толық әлеуетін жүзеге асыруға кедергі келтіретін логистикалық қиындықтарды жою мүмкін емес, - деді сарапшы.
Бұл тұрғыда Сергей Мельконян екі ел де көлік-логистикалық дәліздерді дамытуда бірлесіп жұмыс істей алатынына сенімді. Бұл өз кезегінде транзиттік әлеуетті арттырып, өңірлік экономикалық интеграцияның тығыз байланысын қамтамасыз етеді.
— Бұл ынтымақтастық Армения экономикасын әртараптандыруға және азық-түлік қауіпсіздігін жақсартуға ықпал етеді. Осы орайда ұлттық қауіпсіздік пен тұрақтылықтың маңызды аспектісі саналады. Бүгінде қос елдің арасында қарым-қатынасты екі бағы бойынша өрбітуге болады: «Қазақстан-Ресей-Грузия-Армения» (теңіз және құрлық бойынша) және «Қазақстан-Иран-Армения» (теңізбен). Қазіргі маршруттарға қосымша «Қазақстан-Түрікменстан-Иран-Армения» бағыты қосылды. Жеңілдетілген рәсімдерді қамтамасыз ету екіжақты сауда-экономикалық қарым-қатынастарды дамытуға, сонымен қатар біздің елдеріміздің ауқымды нарықтарға шығуына ықпал етеді. Құрлық және теңіздегі бағдарлар бойынша қарым-қатынас әуе жолынан оқшау дамымауы тиіс. Тікелей әуе қатынасын ашу мәселесі екіжақты күн тәртібінде басым орын алуы тиіс екенін атап өткен жөн. Ол көлік-логистикалық бағыттарды дамытудың қозғалтқышы болатын туризм мен бизнестің дамуын ынталандырады, - деді сарапшы.
Бұған дейін Қазақстан мен Армения байланысы қай бағытта дамып келе жатқанын жазған едік.
