Қазақстан «Баку-Тбилиси-Джейхан» құбыры арқылы мұнай тасымалын 2,2 млн тоннаға ұлғайтады
АСТАНА. KAZINFORM — «Баку-Тбилиси-Джейхан» құбыры арқылы елімізде мұнай тасымалы артады. Бұл туралы ҚР Премьер-министрінің орынбасары — Сыртқы істер министрі Мұрат Нұртілеу мәлім етті.
— Қазақстандық энергия ресурстарын Әзербайжан арқылы әлемдік нарыққа жеткізу жөніндегі уағдаластығымыз табысты іске асырылып жатыр. Өткен жылы «Баку-Тбилиси-Джейхан» құбыры арқылы шетелдік нарыққа 1,4 млн тонна мұнай тасымалданғаны мәлім. Алдағы уақытта қазақстандық мұнайдың транзитін жылына 2,2 млн тоннаға дейін ұлғайту туралы келісім бар, — деді Мұрат Нұртілеу БАҚ өкілдері алдында мәлімдеме жасай тұрып.
Сондай-ақ, министр әзербайжандық серіктестерімен бірлесіп, Қазақстанның ураны шетелге жүйелі жеткізіліп жатқанын тілге тиек етті.
— Қазақстандық энергоресурстардың тасымалы мен инфрақұрылымдық жобаларды Каспий арқылы жүзеге асыру Оңтүстік Кавказ бен Орталық Азия арасындағы байланыстырушы көпір екені ақиқат, — дейді ведомство басшысы.
Айта кетейік, бүгін елордаға Әзербайжан Республикасының Сыртқы істер министрі Джейхун Байрамов ресми сапармен келді.
Сапар аясында әзербайжандық министр Қазақстан Республикасы Премьер-министрінің орынбасары — Сыртқы істер министрі Мұрат Нұртілеумен шағын және кеңейтілген құрамда келіссөз өткізді.
