Қазақстан бокс федерациясы кубогының іріктеу кезеңі басталды

ҚАРАҒАНДЫ. ҚазАқпарат - Қарағанды қаласында бокстан Қазақстан бокс федерациясы кубогының іріктеу кезеңі басталды. Бұл қалада Қарағанды, Қызылорда, Ақтөбе және Солтүстік Қазақстан облыстарының боксшылары сынға түседі, деп хабарлайды ҚазАқпарат тілшісі.

Іріктеу кезеңі 4-6 қазан аралығында өткізіледі. Бүгін алғашқы жекпе-жектер болды. Қарағанды боксшылары қызылордалық, Ақтөбе спортшылары Солтүстік Қазақстаннан келген қарсыластарын 6:2 есебімен жеңді.

Естеріңізге сала кетелік, биылғы бокстан Қазақстан бокс федерациясы кубогының жеребесі бойынша 16 облыс құрамасы төрт топқа бөлінген. Қарағандыда А тобындағы облыс құрамалары сынға түссе, Көкшетауда В, Шымкентте С, Ақтауда D тобындағы облыс құрамаларының былғары қолғап шеберлері қолғап түйістіреді. Іріктеу кезеңіндегі жекпе-жектер 3-13 қазан аралығында болады.

Аталмыш турнир биыл оныншы мәрте жалауын көтерді. Бұдан бұрынғы жылдарда Нұр-Сұлтан қаласы (2010, 2013), Қарағанды (2011), Жамбыл (2014), Түркістан (2015, 2017), Маңғыстау (2012, 2016, 2018) облыстары Қазақстан бокс федерациясы кубогында жеңімпаз атанған болатын.