Қазақстан БРИКС саммитінің мақсаты мен міндеттерін толығымен қолдайды
АСТАНА. KAZINFORM - Қазақстан Премьер-Министрінің орынбасары – Сыртқы істер министрі Мұрат Нұртілеу бастаған қазақстандық делегация БРИКС саммитінің бірінші күнінің отырысына қатысты, деп хабарлайды Кazinform агенттігінің меншікті тілшісі.
Кездесу «Көпжақтылықты, экономикалық және қаржылық мәселелерді және жасанды интеллектті нығайту» тақырыбында өтті.
– Қазақстан болжауға болмайтын және бұрын-соңды болмаған сынақтар кезінде көпжақтылық идеялары мен құндылықтарын ілгерілетуге бағытталған осы саммиттің игі мақсаттары мен міндеттеріне толығымен қосылады. Бұл міндет бұрын-соңды болмаған бірлікті, орасан зор адами және материалдық ресурстарды тартуды, баршамыздан даналықты және сындарлы қатысуды талап етеді, - деді Мұрат Нұртілеу.
ҚР СІМ басшысы БРИКС басымдықтарын толық көрсететін Азиядағы өзара іс-қимыл және сенім шаралары жөніндегі кеңес, БҰҰ-ның Орталық Азия және Ауғанстан бойынша өңірлік орталығы, Әлемдік және дәстүрлі діндер көшбасшыларының съезі сияқты бастамалар арқылы Қазақстанның теңгерімді және көпвекторлы сыртқы саясатын атап өтті.
Орталық Азия мемлекеттерінің Консультативтік кеңесі және С5+ Қытай, Ресей, Үндістан, Парсы шығанағы мемлекеттері, ЕО, АҚШ, Жапония және Корея өңірлік диалог алаңдары да атап өтілді. Бұл сындарлы диалогты, өзара түсіністік пен қолдауды ілгерілетудің маңызды көпжақты механизмі болып саналады.
– Біз Нью-Делидің келесі Орталық Азия-Үндістан саммитін өткізу туралы бастамасын қолдаймыз, - деді Мұрат Нұртілеу.
БҰҰ-ның рөліне және Бас хатшы Антониу Гутерриштің жаһандық шешімдер қабылдау үдерісі бойынша реформалық бағдарламаларын қолдау қажеттілігіне ерекше назар аударылды.
ҚР Сыртқы істер министрлігінің басшысы болжамдылық пен тұрақтылықты нығайту, заңды құқықтарды құрметтеу, дипломатия мен диалогты ынталандыру, сондай-ақ БҰҰ Жарғысында және халықаралық құқықта бекітілген нормалар мен қағидаттарды ұстану арқылы жақсы әлем үшін күресуге шақырды, бұл әсіресе Таяу Шығысты, Африканы, Еуразияны, Оңтүстік Азия және Кавказды қоса алғанда, Жер шарының әртүрлі бөліктеріндегі қақтығыс әлеуетінің шиеленісуі аясында өзекті болып отыр.
– БҰҰ-ның 80 жылдығына орай Президент Қасым-Жомарт Тоқаев биылғы жылдың қыркүйегінде Нью-Йоркте БҰҰ реформасына қатысты өзінің стратегиялық көзқарасын баяндайды, - деді Мұрат Нұртілеу.
Жаһандық экономикалық белгісіздік пен сауда соғыстары жағдайында Қазақстан басқа салалардағы ынтымақтастықты шектемей, БРИКС серіктестерімен энергияны әртараптандыру, азық-түлік қауіпсіздігі, көлік және логистика, білім беру, жасанды интеллект және цифрлық трансформация салаларындағы ынтымақтастықты тереңдетуге бейілді.
– Мен сондай-ақ БРИКС елдерін жеңілдетілген шарттармен және қолайлы, болжамды инвестициялық ахуалмен қамтамасыз етілген Қазақстанның инвестициялық мүмкіндіктерін зерттеуге шақырамын, - деді ҚР СІМ басшысы.
Әлемде цифрлық технологиялар мен жасанды интеллект маңызды рөл атқаратынын ескерсек, Қазақстан бұл салада тығыз ынтымақтастыққа дайын.
Дипломат өңірдегі ең қуатты суперкомпьютер – IT-стартаптарға арналған Alem.AI хаб жақында Қазақстанда іске қосылғанын, сонымен қатар цифрлық валюталарды күнделікті өмірде қолдануға болатын крипто қалашық ашылатынын мысалға келтірді.
Сондай-ақ кез келген технологиялық революция технологияға тең емес қолжетімділік, жұмыс орындарының қысқаруы, цифрлық егемендік проблемасы және жаһандық технологиялық монополияларға тәуелділік сияқты тәуекелдермен байланысты екені айтылды.
– Сондықтан БРИКС елдері ойында қалып қана қоймай, оны басқаруы керек, - деп кеңес берді Мұрат Нұртілеу.
Сөзінің соңында қазақстандық делегация басшысы бейбіт, гүлденген және тұрақты болашақты бірлесіп құру үшін нәтижелер мен консенсусқа бағытталған көпжақты ынтымақтастықты нығайтудың маңызын атап өтті.
Бұған дейін Бразилияға БРИКС құрамындағы елдердің (Ресей, Үндістан, Қытай, Оңтүстік Африка Республикасы, Сауд Арабиясы, Мысыр, Біріккен Араб Әмірліктері, Эфиопия, Индонезия және Иран), сондай-ақ 10 серіктес елдің (Беларусь, Боливия, Қазақстан, Куба, Малайзия, Нигерия, Таиланд, Уганда, Өзбекстан және Вьетнам) делегациялары барғанын жазған болатынбыз.
Сонымен қатар Чили, Колумбия, Кения, Мексика, Палестина, Түркия, Уругвай сияқты елдер мен Африка одағы, Азиялық инфрақұрылымдық инвестициялар банкі (AIIB), Анд даму корпорациясы (CAF), Жаңа даму банкі (NDB), БҰҰ және Дүниежүзілік сауда ұйымы (WTO) сияқты халықаралық ұйымдардың өкілдері қатысатынын растады.
