Қазақстан ғалымдары 3 жылда 81 халықаралық патент алған

АСТАНА. KAZINFORM – Қазақстандықтардың өнертабыстағы белсенділік коэффиценті 45,77-ге жеткен. Бұл туралы Ғылым және жоғары білім министрлігі Kazinform сауалына жолдаған жауабында айтылған.

«Статистикада елдің өнертапқыштық белсенділік коэффициенті патенттеу ведомствосына берілген өтінімдердің 1 млн адамға шаққандағы саны арқылы айқындалады», - деп жазылған министрліктің түсіндірмесінде.

Ұлттық зияткерлік меншік институтының мәліметі бойынша, бұл коэффициент 2021 жылы – 41,28, 2022 жылы – 42,39, 2023 жылы – 45,77 болған.

«Ұлттық зияткерлік меншік институтының жылдық есебіне сәйкес, Patent Cooperation Treaty тәртібі бойынша халықаралық патентке 2021 жылы 31 өтінім, 2022 жылы – 24 өтінім, 2023 жылы – 26 өтінім берілді. Еуразиялық патенттік конвенция тәртібі бойынша 2021 жылы – 81 өтінім, 2022 жылы – 78 өтінім, 2023 жылы – 103 өтінім берілді», - делінген жауапта.

Айта кету керек, Patent Cooperation Treaty рәсімі бойынша бір халықаралық өтінім беру арқылы өтінім беруші дүние жүзінің көптеген елдерінде өз өнертабыстарын қорғауды қамтамасыз ете алады.

Ал Еуразиялық патенттік конвенция жеке және заңды тұлғаларға өздерінің өнертабыстары мен өнеркәсіптік үлгілеріне иелік ету құқығын біртұтас еуразиялық патент негізінде қорғауға мүмкіндік береді.

Жалпы Қазақстанның өнеркәсіптік меншік объектілеріне 2021 жылы 12 761 қорғау құжаты, 2022 жылы 12 099 құжат, 2023 жылы 13 270 құжат берілген.