Қазақстан ғалымдарының онкологияға қарсы дәрісін шығару үшін қанша ақша керек
АСТАНА. KAZINFORM – Ғылым және жоғары білім министрлігі Kazinform сауалына жолдаған жауапта академик Дос Сарбасов бастаған қазақстандық ғалымдардың онкология қарсы дәрісін өндірістік деңгейге шығару үшін қанша ақша кетуі мүмкін екенін айтты.
- «National Laboratory Astana» жеке мекемесінің ақпаратына сәйкес препараттың ресми сауда атауы тіркеу кезінде белгіленеді және одан әрі пайдалану процесі кезінде қолданылады. Бұл препараттың патенттелмеген халықаралық жалпы атауы – «Эриторб қышқылы». Клиникалық зерттеу сатысында қолданылатын әдеттегі атауы – DVC. Егер ҚР Денсаулық сақтау министрлігі арқылы аталған препарат тіркелген жағдайда, пациенттерді емдеу үшін клиникада қолдануға рұқсат етілгенін білдіреді. Дүниежүзілік денсаулық сақтау ұйымы дәрі-дәрмектерді тіркеумен айналыспайды (вакциналар үшін пандемия кезінде ерекше жағдай жасалды). Қазіргі уақытта клиникалық зерттеулердің бірінші кезеңі (қауіпсіздік пен төзімділікті бағалау) аяқталуға жақын. Зерттелетін препарат (DVC) және мышьяк триоксидімен (arsenic trioxide) DVС комбинациясы қанағаттанарлық түрде төзімді екендігі анықталды, - деп жазылған ведомствоның «National Laboratory Astana» жеке мекемесімен бірлесіп әзірлеген жауабында.
Клиникалық сынақтар бірнеше кезеңмен, әр кезең бірнеше сатымен өтетінін бұған дейін жазған едік.
- Одан әрі клиникалық зерттеулердің үшінші кезеңі жүргізілуі керек. Қолданудың маңызды көрсеткіштерін таңдау үшін қатерлі ісіктің әртүрлі формалары мен түрлерінде зерттелетін препараттың тиімділігін пайдалану көзделген. Осы уақытқа дейін стандартты терапияның әсері болмаған кезде қатерлі ісіктің 4-сатысындағы науқастардың жағдайының тұрақты екендігі туралы айтуға болады.
Қазіргі уақытта зерттелетін DVC дәрілік препараты барлық қажетті жағдайлары бар және GMP бойынша аттестатталған өндірістік алаңында өндіріледі. Халықаралық әдебиеттерде озық фармацевтикалық компаниялардың тәжірибесіне сүйене отырып, терапевтік салаға байланысты жаңа препаратты әзірлеу құны 314 миллионнан 4,46 миллиард долларға дейін деп есептеледі. DVC көрсеткіш кеңістігінің айқын болмағандығын ескере отырып, инвестициялық қаражаттың өтелу мерзімін есептеу қиын, - делінген жауапта.
Қазіргі таңда препарат колоректальды қатерлі ісікке қолданылады.
- Бұл - қатерлі ісіктің ең көп таралған түрлерінің бірі. Қазақстанда жыл сайын колоректальды қатерлі ісіктің 3000-нан астам жаңа жағдайы анықталады. Онкологиялық аурулардың құрылымында колоректальды қатерлі ісік 4-орында. Алайда, клиникалық зерттеулердің үшінші кезеңі аяқталғаннан кейін тиімділік спектрі анықталады және сол кезде DVC қолданудың кеңістігі мен инвестицияланған қаражаттың өтелу уақытын дәлірек көрсетуге болады, - деп жазады мамандар.
Қазақстандық ғалымдардың ғылыми нәтижелері әлемдік ғылыми қоғамдастықта мына жарияланымдар арқылы ұсынылған.
- Дәйексөзге сүйенсек, DVC зерттеу нәтижелеріне жоғары қызығушылық бар. Осы жобаны коммерцияландыру – клиникалық зерттеудің қорытынды нәтижелерін алғаннан кейін болатындығы заңдылық. Препарат көктамыр ішіне енгізуге арналған ерітінді түрінде қол жетімді болады. Клиникалық зерттеулер аяқталғанға және нәтижелер жарияланғанға дейін шетелдік инвесторлардың қызығушылығына үміттену қиындау болып отыр, - деп жазылған ведомство мәліметінде.
Еске салсақ, Премьер-Министр Олжас Бектенов Үкіметтің кеңейтілген отырысында препараттың жыл соңына дейін тіркеуден өтетінін мәлім еткен болатын.
