Қазақстан халықаралық арбитраж дауларына шығындарды азайтты
АСТАНА. KAZINFORM – ҚР Әділет вице-министрі Дәниел Ваисов халықаралық арбитраждық іс жүргізуге жұмсалатын мемлекеттік шығындар қысқартылғанын мәлім етті.
— Әділет министрлігі жыл сайын шығындарды азайтып келеді. 2021 жылдан бастап біз шығындарды үш есеге жуық қысқарттық. Жалпы алғанда, Қазақстан Республикасы осы істер бойынша жетекші заңгерлік компанияларды жұмылдырып отыр. Себебі қарсы уәж айтып тұрған мердігер компаниялар да жетекші заңгерлік фирмаларды тартып жатыр», - деді Дәниел Ваисов Сенатта тілшілер сұрағына жауап бере отырып.
Вице-министр халықаралық заңгерлік фирмалардағы қызметтерінің құны өсіп келе жатқанын атап өтті. Көп жағдайда ел Нью-Йорктен, сондай-ақ АҚШ-тың басқа да қалаларынан және Лондоннан заңгерлерді тартады.
Еске салсақ, Әділет министрі Ерлан Сәрсембаев халықаралық арбитраждық талқылауларға қатысты түсінік берді.
