Қазақстан қаржыгерлер конгресінде «Цифрлық теңге» жобасы іске қосылды
Қазақстан қаржыгерлерінің XI Конгресінде Еуразиялық банк Mastercard платформасында шығарған цифрлық теңгедегі жаңа дебеттік карта ұсынылды, деп хабарлайды Kazinform.
Ұлттық валютаның 30 жылдығы күні цифрлық теңгедегі карта бойынша алғашқы сатып алуды Қазақстанның Ұлттық төлем корпорациясының төрағасы Бинұр Жаленов жасады. Цифрлық теңгедегі шоттағы қаражат лезде дәстүрлі теңгеге айырбасталды және әлемнің кез келген нүктесінде картамен төлеу үшін қолжетімді болды.
«Цифрлық теңге - қолма-қол және қолма-қол емес ақшадан басқа ұлттық валютаның үшінші нысаны. Ол инновациялық қаржы қызметтерін құру үшін блокчейн технологиясының әлеуетін ашады, мемлекеттік шығыстардың атаулылығы мен тиімділігін қамтамасыз етеді, сондай-ақ дәстүрлі қаржы мен цифрлық активтер әлемі арасында «көпір» салады. Бүгін өткізілген іске қосу цифрлық теңге экожүйесін дамытуға бастама болды және жақын арада қазақстандықтар оның негізінде алғашқы өнімдерді пайдалана алады», - деп атап өтті Қазақстанның Ұлттық төлем корпорациясының төрағасы Бинұр Жаленов.
Айтуынша, цифрлық теңге атаулы әлеуметтік төлемдер, мемлекеттік сатып алу тиімділігін арттыру, трансшекаралық төлемдерді оңтайландыру, бағдарламаланатын төлемдерді құру үшін жаңа мүмкіндіктер ашатын қолма-қол және қолма-қол ақшасыз ақшаның бұрыннан бар артықшылықтарын біріктіреді. Цифрлық теңгені үш кезеңмен енгізу 2025 жылдың соңына қарай аяқталады деп күтілуде.
«Цифрлық теңге» жобасына қатысу блокчейн және криптовалюта технологиясын қолдана отырып, тұтынушылар мен бизнес үшін инновациялық өнімдерді іске қосу, цифрлық активтер үшін реттеуші негізді дамыту бойынша мүмкіндіктер ашады және тұтастай алғанда бұл елдегі жаңа цифрлық экономиканы дамытудағы үлкен қадам. Ұлттық валютаның енгізілуінің 30 жылдығын атап өтетін күндері қазақстандықтарға цифрлық теңгедегі төлем картасын ұсынғанымыздың символдық мәні бар. Бұл карта біздің клиенттеріміз арасында сұранысқа ие және танымал өнім болатынына сенімдіміз», – деді Еуразиялық банктің басқарма төрағасы Ләззат Сатиева.
Сарапшылардың айтуынша, цифрлық теңгедегі дебеттік карта ұстаушылар үшін де, сауда кәсіпорындарының иелері үшін де бірқатар маңызды артықшылықтарды ұсынады. Карта ұстаушы банктегі цифрлық теңгедегі шотқа қол жеткізе алады және онымен бірге төлемнің тағы бір тәсіліне және өз қаражатын басқаруға икемділікке қол жеткізеді. Карта иелері цифрлық теңгені офлайн, интернет-дүкендерде және түрлі сайттар мен қосымшаларда қауіпсіз жұмсай алады. Картаны тұтынушының телефонында, сағатында немесе қалтасындағы әмиянында сақтауға болады.
