Қазақстан Қытайға бір жылда 5,5 млрд текше метр газ тасымалдаған
АЛМАТЫ. KAZINFORM — «Азия газ құбыры» ЖШС өткен жылы Қытайға 5,5 млрд-қа жуық текше метр отандық газ тасымалдаған.
Бұл туралы «Азия газ құбыры» ЖШС басқарма төрағасы Ерсейіт Қайыпов Kazinform тілшісіне айтты.
Оның айтуынша, «Орталық Азия — Қытай» газ құбыры арқылы тасымалданатын қазақстандық газдың бір бөлігі Қытайға тасымалданады.
— «Бейнеу-Бозой-Шымкент» газ құбыры Түркістан облысындағы Ақбұлақ газ өлшеу стансасынан бастап «Орталық Азия — Қытай» құбырына қосылады. Одан ары қарай Түркістан облысынан Алматы облысына дейінгі өңірлерді газбен қамтып, бір бөлігі Қытайға тасымалданады. Өткен жылдың қорытындысы бойынша, 5,5 млрд текше метр газ Қытайға жіберілді, — деді Ерсейіт Қайыпов.
Басқарма төрағасының айтуынша, аталмыш газ құбыры еліміздің оңтүстік өңірлерін жылына 2,5-3 млрд текше метр газбен қамтамасыз етіп отыр.
