Қазақстан қор биржасының басшысы ауысты
АЛМАТЫ. KAZINFORM – «Қазақстан қор биржасы» АҚ (KASE) басқарма төрағасы болып Әділ Мұхамеджанов сайланды.
– Қазақстан қор биржасының (KASE) директорлар кеңесінің шешімімен Әділ Мұхамеджанов 2025 жылдың 31 наурызынан бастап KASE басқармасының төрағасы болып сайланды. Оның өкілеттік мерзімі 2026 жылғы 1 шілдеге дейін жалғасады,– деп хабарлады KASE баспасөз қызметі.
Әділ Мұхамеджанов 2021 жылдан бері «Орталық бағалы қағаздар депозитарийі» АҚ басқарма төрағасы қызметін атқарған. Бұған дейін KASE басқарма төрағасының орынбасары болып жұмыс істеген, сондай-ақ ҚР Ұлттық банкі монетарлық операциялар департаментінде түрлі лауазымдарды атқарған.
Сондай-ақ, Қазақстан қор биржасы (KASE) директорлар кеңесінің шешімімен 2025 жылдың 31 наурызынан бастап Алина Алдамбергеннің KASE басқарма төрағасы ретінде өкілеттігі тоқтатылды.
Ол бұл қызметті 2016 жылдың 9 ақпанынан бастап атқарып келеді. Осы тағайындауға дейін А.Алдамбергеннің қаржы нарығында, оның ішінде реттеуші органдарда және KASE директорлар кеңесінде айтарлықтай тәжірибесі болды.
Осыған дейін Қазақстан қор биржасындағы (KASE) сауда-саттық қорытындысы бойынша 1 доллардың теңгеге шаққандағы бағамы төмендегені туралы жаздық.
