Қазақстан мен Ауғанстан арасындағы сауда айналым 330,7 млн долларға жетті
АЛМАТЫ. KAZINFORM – Алматыда Қазақстан мен Ауғанстан арасындағы сауда-экономикалық ынтымақтастықты дамытуға бағытталған «Қазақстан-Ауғанстан» бизнес-форумы өтіп жатыр.
Қазақстан Республикасы Премьер-Министрінің орынбасары Серік Жұманғариннің айтуынша, Қазақстан Оңтүстік және Орталық Азия өңірінде Ауғанстанды маңызды әрі ажырамас серіктес ретінде қарастырады.
Қазақстан мен Ауғанстанның сауда саласында екіжақты және өңірлік форматта ынтымақтастықты дамытуға зор әлеуеті бар.
«Біздің кездесулеріміз тұрақты сипатқа ие. Бұл екі елдің сауда-экономикалық ынтымақтастықты нығайтуға деген жоғары қызығушылығын көрсетеді. Осы жылдың 8 айының қорытындысы бойынша өзара сауда көлемі $330,7 млн-ға жетті. Оның ішінде экспорт 316,5 млн доллар. Ал, Ауғанстаннан импорт $14,1 млн болды. Біз өзара сауда айналымын арттыру және елдеріміздің экономикалық белсенділігін арттыру тек сауда-саттықпен шектелмейді, сонымен қатар бірлескен өнеркәсіптік жобаларды іске асыруға байланысты деп сенеміз. Мемлекеттік органдардың, логистикалық операторлардың және ірі өндірістік компаниялардың қатысуымен келіссөздер жүргізіліп, одан әрі өзара іс-қимылдың негізгі бағыттары айқындалды», - деді форум барысында Серік Жұманғарин.
Ауғанстаннан келген 170 компания өкілдері көлік, мұнай өндіру, болат өнеркәсібі, кілем жасау, ауыл шаруашылығы, банк секторы, сауда және басқа салаларда қызмет атқарады.
Форумның қорытындысы бойынша $50 млн-нан астам сомаға сауда келісімдері жасалады деп жоспарланып отыр.
