Қазақстан мен БАӘ ғарыш саласындағы ынтымақтастықты дамытпақ
Институттың Бас директоры Юсеф аш-Шейбани EIAST-тың негізгі мақсаты Әмірліктерде ғылыми инновацияларды көтермелеу және техникалық прогресті дамыту, ғарыш саласындағы жергілікті мамандардың тобын құру болып табылатынын мәлім етті.
Атап айтқанда, 2009 жылы институт Байқоңыр ғарыш айлағынан бірінші «Dubai Sat-1» ғарыш серігін ойдағыдай ұшырды. Ғарыш серігінен алынған көріністер халықаралық ұйымдармен Пәкістандағы су тасқынының және Жапониядағы цунамидің зардаптарын жою үшін пайдаланылды. Ғарыштан жасалған фотосуреттер сондай-ақ жағалық аймақтағы топырақ эрозиясын және балдырлардың таралуын бақылауға көмектесті. Екінші «Dubai Sat-2» ғарыш серігі 2013 жылы қараша айында ұшырылды. Қазіргі уақытта EIAST БАӘ-нің Президенті шейх Халифа бен Заид әл Нахаянның құрметіне аталған жаңа ұлттық инновациялық «Khalifa Sat» серігін жасақтауда. Жерді қашықтан барлайтын салмағы 330 кг жаңа серік орбитаға 2017 жылы ұшырылады.
Сұхбат кезінде Қазақстан Елшісі Қайрат Лама Шәріп EIAST басшылығын жергілікті адам ресурстарын дамыту және аса заманауи инфрақұрылым мен технологияларды, оның ішінде ғарыштық ғылымды инвестициялаудағы мол табыстарымен құттықтады. Осы ретте ҚР Ұлттық ғарыш агенттігі мен Әмірліктердің перспективалы ғылым және технологиялар институты арасында 2011 жылғы қарашада Дубай қаласында қол қойылған Ғарыш кеңістігін бейбіт мақсаттарда зерттеу және пайдалану саласындағы ынтымақтастық туралы келісімде ғарыш саласындағы Қазақстан-БАӘ ықпалдастығының негізгі бағыттары белгіленгені атап өтілді.
Тараптар келесі кезекте ғарыштық технологияларды пайдалану саласындағы екіжақты қатынастарды нақты және өзара тиімді жобалармен толықтыру қажет деген ортақ пікірмен келісті. Осыған байланысты қазақстандық дипломат EIAST институтының бас директоры Юсеф аш-Шейбаниге ҚР Ұлттық ғарыш агенттігінің төрағасы Талғат Мұсабаевтың жұмыс сапарымен Қазақстанға шақыруын табыс етті, деп хабарланған ҚР СІМ ресми сайтында.