Қазақстан мен Беларусь әскери-техникалық ынтымақтастықты әрі қарай дамытуға мүдделі

АСТАНА. 15 қараша. ҚазАқпарат - Бүгін Астанада әскери-техникалық ынтымақтастық жөніндегі Қазақстан-Беларусь шағын комиссиясының төртінші отырысы болды, деп хабарлады ҚР Қорғаныс министрлігінің баспасөз қызметінен.

Пленарлық отырыстың жұмысына Қазақстан мен Беларусьтің бірқатар салалық министрліктерінің, ведомстволары мен қорғаныс кәсіпорындарының өкілдері қатысты.

Келіссөздер барысында қатысушылар Қазақстан-Беларусь әскери-техникалық ынтымақтастығының, қорғаныс-өнеркәсіптік кешендерін одан әрі дамытудың, сондай-ақ екі ел өзара іс-қимылының нормативтік-құқықтық базаларын жетілдірудің өзекті мәселелерін талқылады.

Тараптар бірлескен жобаларды іске асыру шеңберінде әскери-техникалық ынтымақтастықты әрі қарай дамытуға мүдделілік білдірді.

Шағын комиссия төртінші отырысының қорытындысы бойынша тараптар тиісті екіжақты Хаттамаға қол қойды.