Қазақстан мен Қатар әскери ынтымақтастықты нығайтады - заң
АСТАНА. KAZINFORM — Бүгін Мәжілістің жалпы отырысында «Қазақстан Республикасының Үкіметі мен Қатар Мемлекетінің Үкіметі арасындағы әскери ынтымақтастық туралы келісімді ратификациялау туралы» Заңы қабылданды.
«Келісімге 2023 жылғы 12 желтоқсанда Дохада екі елдің қорғаныс ведомствосының басшылары қол қойды. Қатар біздің еліміздің сол өңірдегі маңызды саяси және экономикалық серіктесі саналады. Мұнымен қоса, әскери ынтымақтастық сияқты перспективалы бағыттар бар. Келісімді ратификациялау тараптарға әскери білім беру мен ғылым, әскери медицина, бейбітшілікті қолдау жөніндегі операциялар, жауынгерлік даярлық байланыстарын, сондай-ақ келісілген салаларда әскери ынтымақтастықты жүзеге асыру мүмкіндігін береді», - деді ҚР Қорғаныс министрінің орынбасары Дархан Ахмедиев.
Оның айтуынша, Қазақстанның халықаралық шарттар туралы заңына сәйкес аталған келісім ратификациялануы тиіс. Аталған заңды қабылдау теріс әлеуметтік-экономикалық және құқықтық салдарға әкеп соқпайды.
Айта кетейік, биыл жазда Қазақстан мен Әзербайжанның қорғаныс министрлері әскери ынтымақтастық туралы келісімге қол қойды.
