Қазақстан мен Қырғызстан арасында шешімін таппаған ешқандай мәселе болмауы керек — Президент
АСТАНА. KAZINFORM — Жоғары мемлекетаралық кеңес қазақ-қырғыз қарым-қатынастарына ерекше серпін береді. Бұл туралы Ақордада Қырғызстан Президенті Садыр Жапаровтың сапарына орай Жоғары мемлекетаралық кеңестің отырысында Мемлекет басшысы Қасым-Жомарт Тоқаев айтты.
«Бүгін біз көптен күткен маңызды басқосуға жиналдық. Екі ел арасындағы қарым-қатынастың қарқынды дамуы осы кеңесті өткізуге ықпал еткені сөзсіз. Отырыс барысында қазақ-қырғыз ынтымақтастығының ең өзекті мәселелері қаралады. Біз Қырғызстан президентімен шағын құрамда келіссөз өткіздік. Қарым-қатынасты кеңейтуге бейілді екенімізді тағы да растадық. Садыр Нұрғожоұлы (Қырғызстан Президенті) екі ел арасында шешімін таппаған ешқандай мәселе болмауы керектігін айтты. Мен бұл пікірмен толық келісемін», — деді Қасым-Жомарт Тоқаев.
Мемлекет басшысы уақыт сынағынан өткен ықпалдастығымыздың келешегі зор екеніне кәміл сенетінімін айтты.
«Бұл бағытта бір кісідей күш жұмылдыруымыз қажет. Осы орайда Жоғары мемлекетаралық кеңестің жұмысы қазақ-қырғыз қарым-қатынастарын дамытуға ерекше серпін береді деп сенемін. Сондай-ақ бұл қадам әріптестігімізді жаңа деңгейге көтереді деп есептеймін», — деді Қазақстан Президенті.
Бұдан бұрын хабарланғандай, бүгін Мемлекет басшысы Қасым-Жомарт Тоқаев Қазақстанға ресми сапармен келген Қырғызстан Президенті Садыр Жапаровты Ақордада күтіп алды.
Кеше, 18 сәуір күні Мемлекет басшысы Қасым-Жомарт Тоқаев Қазақстанға ресми сапармен келген Қырғызстан Президенті Садыр Жапаровты елорда әуежайында күтіп алған болатын.
Астанада Қасым-Жомарт Тоқаев пен Садыр Жапаров екі ел өнерпаздарының гала-концертін тамашалады.
Сондай-ақ, елордада Қырғыз Республикасының Президенті Садыр Жапаровтың ресми сапары аясында Қазақстанның мәдениет және өнер қайраткерлеріне Қырғызстанның мемлекеттік наградаларын тапсыру рәсімі өтті.
