Қазақстан мен Қытай шеберлері 10 мың текше метр қардан мүсіндер жасады (ФОТО)

АСТАНА. ҚазАқпарат - Алматы облысында «Қорғас» шекара маңы ынтымақтастығының халықаралық орталығында мұз бен қардың алғашқы Қорғас қазақстандық-қытай фестивалі ашылды, деп хабарлады орталықтың баспасөз қызметі.

Мұздан жасалған мүсіндер жалпы көлемі 5 мың шаршы метр болатын аумақта орналасты. Қазақстан мен Қытай шеберлері аз ғана уақыттың ішінде ауа райының жылылығы мен қардың аздығына қарамастан, үлкен қар және мұз мүсіндерін жасады. Фестивальға қатысушылар өз ойындағыларын жүзеге асыруы үшін «Қорғас» орталығына 10 мың текше метрге жуық жасанды қар жеткізілді.

«Мен болашақта біздің фестиваліміз әлемдегі осыған ұқсас шаралардың арасында лайықты орынға ие болады деп сенемін, себебі оның ерекшелігі - ол бір уақытта бір территорияда, бірақ екі түрлі мемлекетте өтіп жатыр», - деп атап өтті фестивальдің ашылу салтанатында «Қорғас» ШЫХО» АҚ президенті Асхат Хамитов.

Фестиваль аясында «Дунфан» халықаралық көрме орталығында Қазақстан мен Қытайдан 19 жас жұбайлардың салтанатты неке қию рәсімі өтті. Сондай-ақ кешкі мерекенің қонақтарына арналып концерт қойылды. Оған Қазақстан мен Қытай әртістері қатысты. Қар мен мұздың Қорғас фестивалін жыл сайын өткізу жоспарланып отыр.