Қазақстан мен Өзбекстан арасындағы шекара сызығы 5 км ұзарады

АСТАНА. ҚазАқпарат – Қазақстан мен Өзбекстан арасындағы шекара сызығы 5 шақырымға ұзарады. Бұл туралы Сыртқы істер вице-министрі Роман Василенко Сенаттың жалпы отырысынан кейін айтты, деп хабарлайды ҚазАқпарат тілшісі.

«Кейінгі 19 жылдағы демаркациямен байланысты процестер кезінде шекара сызығы өтетін тұстар нақтыланды. Бұл мәселеде екі тараптың да жергілікті халқының мүдделері, шекара күзетінің қолайлы болуы ескерілді. Осылайша шекара сызығы 5 шақырымға ұзарып отыр. Нақты айтсақ, тұтас шекараның ұзындығы 2356 шақырым 666 метр болды. Осылайша 5 шақырымға ұзын бола түсті», - деді Роман Василенко.