Қазақстан мен Түркі елдері донорлардың бірыңғай ақпараттық жүйесін құрады
АСТАНА. KAZINFORM – 8 қазан күні Әзербайжанның Шуша қаласында түркітілдес мемлекеттер ұйымына мүше мемлекеттер Türktransplant бірыңғай ақпараттық жүйесін құру туралы хаттамаға қол қойды.
Ұйымға мүше елдердің денсаулық сақтау министрлері мен байқаушыларының IV отырысының қорытындысы бойынша қабылданған Бірлескен декларация шеңберінде тиісті уағдаластыққа қол жеткізілді.
– Türktransplant құрудың мақсаты шамамен 160 миллион халқы бар геосаяси кеңістіктегі азаматтар үшін белгілі бір медициналық қызметтерге қолжетімділікті арттыру, - деп атап өтті Әзербайжан Денсаулық сақтау министрі Теймур Мұсаев баспасөз брифингінде.
Оның айтуынша, бастапқы кезеңде бұл Еуропадағы трансплантология институтына ұқсас «бірыңғай ақпараттық орталық» болуы мүмкін.
– Кейін азаматтар денсаулығының бірыңғай деректер базасын құруға жәрдемдесетін болады. Тиісті сарапшылар жиналып, осы стандарттарды анықтайды, - деп қосты министр ТМҰ-ға мүше елдер арасындағы ақпарат алмасу үдерісіне түсінік бере отырып.
Хаттама мүше елдердің және ТМҰ бақылаушыларының ұлттық заңнамасына сәйкес ТМҰ шеңберінде денсаулық сақтаудың бірыңғай цифрлық стандарттарын әзірлеу арқылы пациенттердің денсаулығы туралы медициналық деректермен алмасуды жеңілдетеді. Бір сөзбен айтқанда, құжат елдер арасындағы донорлық органдар мен трансплантацияны үйлестіруге көмектеседі.
Бірыңғай «Turktransplant» ақпараттық жүйесін құру бастамасы өткен жылы Самарқандта ТМҰ-ына мүше елдердің денсаулық сақтау министрлерінің отырысында көтерілген болатын.
