Қазақстан Оңтүстік Кавказға қызығушылық танытып отыр - сарапшы Президенттің Арменияға сапары жайлы
Президент Қасым-Жомарт Тоқаев бүгін Арменияға ресми сапармен барды. Maqsut Narikbayev University MIND ғылыми-талдау орталығының сыртқы саясат және халықаралық зерттеулер бағдарламасының жетекшісі Мирас Жиенбаев Kazinform тілшісіне сапардың Қазақстан үшін қандай маңызы барын айтып берді.
Оңтүстік Кавказ – маңызы артып келе жатқан аймақ
Сарапшы Мирас Жиенбаевтың пікірінше, Президент пен басқа да мемлекеттік қайраткерлердің Оңтүстік Кавказ елдеріне сапарлауының қазіргі динамикасы біздің осы аймақпен қарым-қатынасымыздың жаңа – сапалы деңгейге көшкенін көрсетеді. Әсіресе, ең алдымен, қазіргі жаһандық тұрақсыздық кезінде Қазақстанның сыртқы саясаты икемді көпжақтылық форматын дамытуда белсенділігін жалғастырып келеді.
Шындығында, Қазақстан Еуразия кеңістігінде күн тәртібіне дипломатия, диалог пен ынтымақтастықтың маңызын ілгері жылжытып жүрген жетекші елге айналып келеді. Бір жағынан, біз өңіріміздің мемлекеттері бұрын-соңды болмаған жаһандық, аймақтық және елге тән сын-қатерлерге тап болғанын көріп отырмыз. Екінші жағынан, Қазақстанның сындарлы сыртқы саясаты Астанаға өзінің елеулі дипломатиялық әлеуетін дамыту үшін бірегей мүмкіндіктер жасайды, – деп атап өтті Мирас Жиенбаев.
Оның айтуынша, Оңтүстік Кавказ өңірі Қазақстанның сыртқы саясаты мен саудасы үшін маңызы артып отырған аймақ болып саналады, Президенттің Арменияға сапары түрлі саладағы екіжақты қарым-қатынасымыздың дамуы үшін нақты міндет жүктеп қана қоймай, мемлекетке осы аймақтағы істерге белсендірек қатысуға мүмкіндік береді.
Президенттің саяси ерік-жігері және даму әлеуеті
Сарапшының пікірінше, Президент Қасым-Жомарт Тоқаев мемлекетаралық ынтымақтастық үшін екіжақты қарым-қатынасты дамытуда өте маңызды саяси жігер танытып отыр.
Іс жүзінде біз Армениямен экономикалық ынтымақтастықта оң динамикаға қол жеткіздік – тек өзара сауда соңғы 5 жылда 3,5 есе өсті. Сонымен бірге, бұл көрсеткіштің алдағы жылдарда өсуі үшін айтарлықтай әлеует бар, – деп атап өтті спикер.
Атап айтқанда, Мемлекет басшысы Қазақстанның Арменияға экспорттық портфелін 70 тауар түрінен 350 миллион долларға арттыруға, оның ішінде өңдеу деңгейі жоғары дайын өнімді ұлғайтуға әзір екенін атап өтті.
Өткен жылдың соңында сауда көлемі 23%-ға артты. Бұл әлеуетті ішінара жүзеге асыру біздің сауда-экономикалық өзара іс-қимылымызды нығайтып қана қоймай, сонымен бірге Қазақстанның экспортқа бағытталған секторлары үшін қосымша оң драйверлер жасайды, – деді сарапшысы.
Аймақтағы бейбітшіліктің кепілі ретінде көлік ынтымақтастығын дамыту
Сарапшының айтуынша, Орталық Азия және Оңтүстік Кавказ екі аймақтың көлік-логистикалық әлеуетін өзара арттыра отырып, стратегиялық жақындасуын жалғастырып жатыр.
Бүгінде біздің бірегей геостратегиялық жағдайымыз әлемдік сауданың жалпы жүйесінде құрлықтық байланысты қамтамасыз етуге мүмкіндік береді. Оңтүстік Кавказ мемлекеттері – біздің көлік-логистикалық әлеуетімізді іске асыруда маңызды стратегиялық серіктестер. Президент Тоқаев өңірлерімізде жаңа көлік-логистикалық дәліздер мен сауда бағыттарын құру бойынша бірлескен жұмыстың елеулі перспективаларына тоқталып, армениялық «Әлемнің тоғысуы» бастамасын өңірлік логистикалық құрылым кешеніне біріктіруге қызығушылық білдірді, – деп атап өтті Мирас Жиенбаев.
Жалпы, оның айтуынша, Қазақстан орта державалар саясатының іс жүзінде сәтті үлгісін көрсете отырып, «әділетті бейбітшілік пен келісім үшін дүниежүзілік бірлік туралы» бастамамыз аясындағы өз идеяларын ілгерілету үшін дипломатиялық әлеуетін пайдаланады. Сонымен қатар, Оңтүстік Кавказ мемлекеттерінің бір-бірімен және Орталық Азия өңірімен диалогы, ынтымақтастығы үшін жаңа мүмкіндіктер жасай отырып, Қазақстан өңіраралық қарым-қатынастар мен бірлесіп дамудың жаңа формуласын құрып жатыр.
