Қазақстан өзге мемлекеттерге қарағанда әлемдік дағдарысты оңай еңсерді - РФ академигі А.Аганбегян
Бүгін Астанада өткен баспасөз мәслихатында РФ ҒА-ның академигі, экономика ғылымдарының докторы, профессор Абел Аганбегян осындай пікір айтты.
«Қазақстанның ЖІӨ-нің өсімі дағдарыстың 2008 және 2009 жылдардағы кезеңдерінде өте төмен, шамамен 1 пайыз деңгейінде болды», - дейді А. Аганбегян.
Алайда ЖІӨ деңгейі «минусқа» кетіп қалған ТМД, Еуропа, Балтық елдерінің жағдайын келтірген профессор, «олармен салыстырғанда, ТМД кеңістігіндегі Қазақстан және Беларус сынды ірі мемлекеттер дағдарысты оңай еңсерді», - деп атап көрсетті.
Соның ішінде Қазақстанның сыртқы қарыздарының көлемі әлі де болса өзгермегендігін еске салған А. Аганбегян мырза, дегенмен мемлекеттің ішкі қоры жылдам жинақталып жатқанын, бір жылда ол 22 пайызға салмақтана түскендігін ерекшелеп өтті.