Қазақстан Президенті ресми сапармен Өзбекстанға барады

АСТАНА. 3 маусым. ҚазАқпарат - Қазақстан Президенті Нұрсұлтан Назарбаев ресми сапармен Өзбекстанға барады.

Бұл туралы бүгін өткен брифингте Орталық коммуникациялар қызметінің ресми өкілі Алтай Әбибуллаев мәлімдеді.

Оның айтуынша, бүгін Ташкентте Қазақстан-Өзбекстан үкіметаралық комиссиясының 13-інші отырысы ашылады. Отырыста Қазақстан тарапынан тең төраға ҚР Премьер-Министрінің бірінші орынбасары - Өңірлік даму министрі Бақытжан Сағынтаев болады. Ал Өзбекстан тарапынан тең төраға Бірінші вице-премьер - қаржы министрі Рустам Азимов болады.

«Отырыста Қазақстан-Өзбекстан экономикалық әріптестік мәселелері талқыланады. Бұл шара Өзбекстан Президенті Ислам Кәрімовтің шақыруымен біздің Мемлекет басшысы Нұрсұлтан Назарбаевтың Өзбекстанға ресми сапары қарсаңында өткізіліп отыр», - деп атап өтті А. Әбибуллаев.