Қазақстан Ресеймен бірлесе басқарған уран кәсіпорнын өз бақылауына алды

АСТАНА. KAZINFORM – «Самұрық-Қазына» АҚ «Буденовское» бірлескен кәсіпорнын өз бақылауына алды. Бұл туралы қордың KASE-де жариялаған қаржылық есебінде жазылған. 

Құжатта көрсетілгендей, Жарғы мен Өнімді бөлу туралы келісімге тиісті өзгерістер енгізілген. 2024 жылдың басынан бері кәсіпорынды басқару аясындағы негізгі шешімдер көпшілік дауыспен қабылданып келген. Бұл ретте қазақстандық тараптың үлесі ресми түрде бұрынғыдай — 51% мөлшерінде қалды.

Есепте активке иелік ету үшін ешқандай қосымша қаржы төленбегені көрсетілген. Сонымен қатар, бұрынғы иеліктегі үлесті қайта бағалау нәтижесінде қор 295,7 млрд теңге сомасында біржолғы пайда тапқанын мойындады, ал бұл акцияның бақылауды алу кезіндегі әділ құны 302,9 млрд теңгені құрады.

Кәсіпорынның активтері мен міндеттемелеріне тәуелсіз бағалау жүргізіліп, «Буденовское БК» ЖШС-ның жалпы әділ құны 707,1 млрд теңгеге дейін өсті. Бұл өсімнің басты себебі — жер қойнауын пайдалану құқығын қайта бағалау болды.

«Буденовское БК» ЖШС стратегиялық маңызы бар актив ретінде танылды. Онда 114 мың тонна уран қоры бар деп бағаланып отыр. Бұл көрсеткіш нысанды осы тектес кен орындарының ішінде алдыңғы орынға шығарады.

Айта кетейік, Қазақстан мен Қытай Іле ойпатындағы уран кенішін бірлесіп барламақшы.