Қазақстан Словенияның фармацевтика компаниясымен бірлескен кәсіпорын құруы мүмкін
АСТАНА. KAZINFORM – Астанада Қазақстан-Словения кәсіпкерлік форумы өтіп жатыр. Kazakh Invest ұлттық компаниясы басқарма төрағасының орынбасары Мадияр Сұлтанбек аталған форум ел экономикасына не беретінін айтты.
- Бүгінгі бизнес-форум Словения Республикасы Президентінің Қазақстанға алғашқы ресми сапары аясында өтуде. Мәртебелі мейман өзімен бірге еліндегі ондаған жетекші бизнесмендерден құралған іскер делегацияны ала келді.
Оның көбі словениялық компаниялардың бірінші менеджерлері, бас директорлары, директорлар кеңесінің мүшелері.
Словения бизнесінің өкілдері негізінен фармацевтика сияқты салаларда жұмыс істейді. Словениядағы ең ірі компаниялардың бірі – Krka компаниясы. Біздің елімізде де фармацевтер арасында өте танымал.
Қазір ол компанияның біздегі өкілдіктері сауда серіктес ретінде ғана жұмыс істейді. Қазақстандық фармацевтикалық компаниялар осы кәсіпорынмен бірлескен өндіріс құруға ниетті. Форум аясында осы мәселе де талқыланады, - дейді Kazakh Invest басшысының орынбасары.
Словения Президентімен келген делегацияның құрамында IT және телекоммуникация саласының өкілдері де бар.
- Біздің бұл нарықта бірнеше словениялық компаниялар жұмыс істеп жатыр. Біз жоғары білікті, бағалары салыстырмалы түрде қолайлы словениялық компаниялармен ынтымақты нығайтуға үміттенеміз.
Ал энергетика саласының өкілдерімен жаңартылатын энергия көздері бойынша жобаларды талқылау көзделген. Делегацияда құрылыс саласының өкілдері де бар, - деді Мадияр Сұлтанбек.
Қазір Қазақстан мен Словения арасындағы тауар айналымы 100 млн доллардан, бұл елдің бізге салған инвестициясының көлемі 200 миллион доллардан сәл асады.
- Бұл екі ел әлеуетінің шарықтау шегі емес, әрине.
Форум аясында екіжақты B2B ұйымдастырылады. Ол кездесулерге «Атамекен» ұлттық кәсіпкерлер палатасы мен тиісті мемлекеттік органдар сүйемелдейді, - деді Kazakh Invest өкілі.
Мадияр Сұлтанбектің сөзінше, Батыс Еуропа мен Қазақстан арасында көлік байланысын тоғыз жолдың торабында жатқан Словенияның әлеуеті арқылы тиімді ете түсуге болады.
- Менің ойымша, Қазақстан мен Словения үшін жүк тасымалдаудың өзара тиімді тарифтерін белгілеу аса қиынға соқпау керек. Бүгінгі форум қорытындысы бойынша бірнеше коммерциялық меморандумдар мен келісімдерге қол қоюды жоспарлап отырмыз. Ол уағдаластықтардың жалпы сомасын қазір айту қиын. Өйткені форум аясында бұл келіссөздердің ақырғы сатысы жүріп жатыр, - деді ол.
Еске салсақ, кеше Словения Президенті Наташа Пирц-Мусар елімізге ресми сапармен келіп, келіссөз қорытындысы бойынша бірқатар құжатқа қол қойылған еді.
