Қазақстан Үндістан Премьер-Министрі Н. Модидiң сапарына зор мән береді - Мемлекет басшысы

АСТАНА. ҚазАқпарат - 2015 жылы Үндістан Премьер-Министрі Нарендра Моди Қазақстанға сапармен келеді. Бұл туралы бүгін Ақордада Қазақстандағы Төтенше және Өкілетті Елші болып тағайындалған бірқатар шетелдік дипломаттан сенім грамотасын қабылдаған Елбасы Нұрсұлтан Назарбаев айтты.

«Қазақстан Үндістанмен арадағы байланысты нығайтуға, ынтымақтастықты дамытуға мүдделі. Біз екіжақты ынтымақтастықты стратегиялық серіктестік деңгейіне шығару үшін зор серпіліс жасадық. Келер жылы жоспарланған Үндістан Премьер-Министрі Нарендра Модидiң сапарына біз өте зор мән береміз», - деді Елбасы.

Айта кетейік, бүгін ҚР Президентіне Италияның Төтенше және Өкілетті Елшісі Стефано Раваньян, Швеция Елшісі Кристиан Камилл, Чех елшісі Элишка Жигова, Литва елшісі Витаутас Наудужас, Мысыр елшісі Хайсам Салах Камел Ибрагим, Үндістан Елшісі Харш Кумар Джайн, Македония Елшісі Илья Псалтиров, Қытай Елшісі Чжан Ханьхуэй сенім грамотасын табыс еткен болатын.