Қазақстанда 180 күнге белгіленген газдың шекті бағасы бекітілді

НҰР-СҰЛТАН. ҚазАқпарат – Бүгін ҚР Үкімет еліміздің барлық өңірінде газдың шекті бағасын бекітті. Шекті баға 180 күнге белгіленіп отыр, деп хабарлайды ҚазАқпарат тілшісі.

ҚР Премьер-Министр ресми сайтының мәліметінше, Ақтөбе, Атырау, Маңғыстау облыстарында – газдың литрі 50 теңге ( 200 шақырымнан асатын шалғай аудандар үшін – литріне 55 теңге) болып белгіленді. Ал Шымкент қаласында Шығыс Қазақстан, Жамбыл, Батыс Қазақстан, Қызылорда және Түркістан облыстарында газдың литрі 60 теңгеден (200 шақырымнан асатын шалғай аудандар үшін - литріне 65 теңге) сатылады. Алматы қаласында литрі 65 теңге болады. Нұр-Сұлтан қаласында, Ақмола, Алматы, Қостанай, Қарағанды, Павлодар, Солтүстік Қазақстан облыстарында газдың литрі 70 теңге ( 200 шақырымнан асатын шалғай аудандарда – литріне 75 теңге) болып бекітілді.

Айта кетерлігі, сұйытылған мұнай газын электронды сауда алаңдары арқылы сатуға толықтай ауысу бір жылға кейін шегерілді.