Қазақстанда ақпараттық қауіпсіздікті күшейту мақсатында жұмыс тобы құрылды

АСТАНА.KAZINFORM — Премьер-министр Олжас Бектеновтің 2025 жылғы 22 мамырдағы өкімімен ақпараттық кеңістіктің қауіпсіздігін арттыру бойынша ұсыныстар мен ұсынымдар әзірлеу үшін ведомствоаралық жұмыс тобы құрылды.

— Ақпараттық кеңістіктің қауіпсіздігін күшейту бойынша ұсыныстар мен ұсынымдар әзірлеу үшін ведомствоаралық жұмыс тобын құру  — делінген құжатта.

Сондай-ақ жұмыс тобына 2025 жылғы 31 қазанға дейін ақпараттық кеңістіктің қауіпсіздігін арттыру жөніндегі ұсыныстар мен ұсынымдарды Үкімет Аппаратына ұсыну тапсырылды.

Ал, аталған өкімнің орындалуын бақылау премьер-министрдің орынбасары Ерлан Қошербаевқа жүктелді.

Жұмыс тобының құрамына мына лауазымды тұлғалар енді:

Премьер-министрдің орынбасары — топ жетекшісі;

Мәдениет және ақпарат министрі — жетекшінің орынбасары;

Мәдениет және ақпарат вице-министрі — хатшы;

Ұлттық қауіпсіздік комитеті төрағасының орынбасары (келісім бойынша);

Қаржылық мониторинг агенттігі төрағасының орынбасары (келісім бойынша);

Сыртқы істер министрінің орынбасары;

Ішкі істер министрінің орынбасары;

Цифрлық даму, инновациялар және аэроғарыш өнеркәсібі вице-министрі;

Қауіпсіздік кеңесі Хатшылығының қауіпсіздік мәселелері бөлімі секторының меңгерушісі (келісім бойынша);

Президент әкімшілігінің коммуникациялар бөлімі секторының меңгерушісі (келісім бойынша);

Президент әкімшілігінің цифрландыруды дамыту бөлімі секторының меңгерушісі (келісім бойынша);

Үкімет аппаратының әлеуметтік даму бөлімі меңгерушісі.

Бұған дейін, Олжас Бектенов Мемлекет басшысының тапсырмаларын орындау бойынша кеңес өткізгенін хабарлағанбыз.