Қазақстанда ауған тауарларын сататын сауда үйі ашылмақ
АЛМАТЫ. KAZINFORM – Қазақстан нарығы ауған кәсіпкерлері үшін ашық болғанын қалаймыз. Бұл туралы Алматыда өтіп жатқан бизнес форумы барысында Ауғанстанның сауда және өнеркәсіп министрі Нуриддин Азизи айтты.
Ауғанстанның сауда және өнеркәсіп министрінің сөзінше, екі елдің экономикалық байланысы аясында елімізде Ауғанстандық сауда үйі ашылмақ.
«Біз Астана қаласында ауғандық тауарлар сатылатын сауда үйін ашуды жоспарлап отырмыз. Одан кейін дәстүрлі көрмелер ұйымдастырмақпыз. Қазақстандық нарықтың ауған кәсіпкерлері үшін ашық болғанын қалаймыз. Осылайша екі ел арасындағы экономикалық байланысты арттырамыз»,- деді Нуриддин Азизи.
Бұған дейін Қазақстан мен Ауғанстан арасындағы сауда айналым 330,7 млн долларға жеткені туралы жазған едік.
Сондай-ақ Ауыл шаруашылығы вице-министрі Ербол Тасжүреков Қазақстан мен Ауғанстан ауыл шаруашылық тауар айналымын 1 млрд долларға дейін арттыратынын айтқан болатын.
