Қазақстанда бизнес кредитке кепілдік беретін бірнеше қор құрылады

АСТАНА. KAZINFORM — Елімізде шағын, орта және ірі бизнес үшін берілетін кредитке кепілдік беретін бірнеше қор құрылады. Қор туралы толығырақ Үкімет басшысының орынбасары Серік Жұманғарин айтып берді.

— Бизнес үшін кредиттерге кепілдік беру елімізде де, басқа елдерде де тиімді практика ретінде танылды. Сондықтан 2 кепілдік беру қоры құрылады. Олардың бірі шағын және орта бизнеске кепілдік береді. Шағын және орта бизнес үшін кредиттерге кепілдік беру және пайыздық мөлшерлемелерді субсидиялау көлемі ұлғаяды. Биылдың өзінде 1,7 трлн теңге сомасына 30 мыңға жуық шағын және орта бизнес жобасына қолдау көрсетіледі, — деді Серік Жұманғарин Үкімет отырысында. 

Сонымен қатар Үкімет басшысының орынбасары елімізде ірі бизнестің кредиттеріне кепілдік беру үшін жаңа қор құрылатынын айтты. 

— Ірі бизнеске арналған кепілдік беру қоры ірі және стратегиялық маңызды жобаларды кепілмен қамтамасыз ету мәселесін шешеді. Бұл ірі бизнес санының көбеюіне әсер етеді. Экспорт әлеуеті орасан зор, бәсекеге қабілетті жобаларды құруда өңдеу өнеркәсібінің әлеуеті жоғары. Оның ішінде металл өңдеу, мұнай-газ, агроөнеркәсіптік кешен өнімдері, химия өнеркәсібі, жеңіл өнеркәсіп, тамақ өнімдері, құрылыс материалдары өндірісі, машина жасау салаларын, сондай-ақ IT саласы бар. Одан бөлек логистика, жүк тасымалдарын, туризмді, шағын және орта бизнесті дамыту үшін эко-орта құрайтын зәкірлік және инфрақұрылымдық жобалар мен кластерлік-жобаларды қаржыландыруға баса назар аударылады, — дейді ол.

Бұған дейін хабарлағанымыздай биыл елімізде рекордтық көлемде тұрғын үй пайдалануға берілмек.