Қазақстанда болған жер сілкінісі Қырғызстанда да сезілді
АСТАНА. KAZINFORM – Қазақстан аумағында болған жер сілкінісін Қырғызстанда шекаралас аудандардың тұрғындары сезінді, деп хабарлайды Kazinform тілшісі.
Төтенше жағдайлар министрлігінің Қырғыз Республикасы Ұлттық ғылым академиясының сейсмология институтына сілтеме жасап хабарлауынша, 28 наурызда сағат 04:42–де Қазақстан аумағында МСК-64 шкаласы бойынша 5,5 балдық жер сілкінісі тіркелді.
Ошақ Көпуро-Базар ауылынан солтүстікке қарай 20 шақырым жерде, Бішкектен оңтүстік-батысқа қарай 133 шақырым жерде орналасқан.
— Жер сілкінісі Талас облысы Талас ауданы Көпуро-Базар ауылында 5 баллға дейін, Қара-Балта және Бішкек қалаларында 4 балл шамасында сезілді, — делінген хабарламада.
Төтенше жағдайлар министрлігі тексеру және түсіндіру жұмыстарын жүргізіп жатыр. Толық ақпарат кейінірек беріледі.
Еске сала кетейік, бүгін түнде Алматыдан 323 шақырым жерде жер сілкінісі тіркелгенін жазған болатынбыз.
