Қазақстанда ІІІ топтағы мүгедектерге мемлекеттік тұрғын үй қорынан баспана беру ұсынылды
«Мүгедектігі үшінші топтағы адамдарды баспанамен қамтамасыз ету мәселесі бар екенін көріп отырмыз. Осы жағдайда, мүмкін оларды мемлекеттік тұрғын үй қорынан баспана алуға құқылы адамдардың тізіміне енгізу қажет болар»,-деді халық қалаулысы «Қазақстан Республикасының Мүгедектердің құқықтары туралы БҰҰ конвенциясын ратификациялауы: оң өзгерістерге ұмтылыс» халықаралық конференциясында.
Бұдан бөлек ол мүмкіндігі шектеулі жандарға қатысты өзге де мәселелерге тоқталды. «Қабылданып жатқан мемлекеттік шараларға қарамастан, шешімін таппаған бірқатар проблемалар бар. Мысалы, мүгедектерді жұмысқа орналастыруда кебір қиындықтар туындайды. Инфрақұрылым нысандарына, көлікке және өзге де әлеуметтік қызметтерге олардың қолжетімділігін қамтамасыз ету бойынша жұмыстар тиісті деңгейде емес»,-деді Ақан Бижанов. Оның пайымынша, мүмкіндігі шектеулі балалар басқаларымен тең дәрежеде білім алуына және қоғамда бейімделуі үшін мектептерде қажетті жағдайды жасау керек. Депутаттың айтуынша, қазіргі кезде елімізде 600 мыңнан астам мүмкіндігі шектеулі жандар өмір сүруде, бұл көрсеткіш жалпы халық санының 3,7 пайызын құрайды.