Қазақстанда қай салаға жасанды интеллект белсенді енгізіліп жатыр
АСТАНА. KAZINFORM – Жасанды интеллектіні дамытуға бағытталған кешенді шараларды іске асыру аясында елімізде «Industrial AI Accelerator» жобасы іске қосылды. Жоба туралы Цифрлық даму, инновациялар және аэроғарыш өнеркәсібі министрлігі Жасанды интеллект және инновацияларды дамыту комитетінің төрағасы Ғиззат Байтұрсынов айтып берді.
– Бұл экономиканың негізгі салаларына жасанды интеллект шешімдерін енгізуге бағытталған акселерациялық бағдарлама. Бағдарлама командаларды іріктеу мен оқытудан бастап, салалық бағыттар бойынша пилоттық жобаларды сүйемелдеу және іске қосуға дейінгі барлық негізгі кезеңді қамтиды, - деді Ғиззат Байтұрсынов орталық коммуникациялар қызметі алаңында өткен баспасөз мәслихатында.
Жасанды интеллект шешімдерін енгізуге бағытталған акселерациялық бағдарламаның бірінші кезеңі келесі саланы қамтыды:
- Тау-кен өнеркәсібі (Mining) — Өнеркәсіп және құрылыс министрлігі;
- Энергетика және мұнай өндіру саласы (EnergyTech) — Энергетика министрлігі;
- Медициналық технологиялар (MedTech) — Денсаулық сақтау министрлігі;
- Қаржы технологиялары (FinTech) — «Астана» халықаралық қаржы орталығы (АХҚО);
- Мемлекеттік технологиялар (GovTech) — Ұлттық ақпараттық технологиялар» АҚ.
Одан әрі министрлік өкілі акселерациялық бағдарламаның бірінші кезеңінің нәтижесімен бөлісті.
– Бағдарламаға қатысушы компаниялардан 116 өтінім қабылданды, 32 компания іріктеуден өтіп, акселерация бағдарламасын сәтті аяқтады. 3 ай ішінде түрлі салада 27 пилоттық жоба іске қосылды. Сол сияқты 4 жоба пилоттық режимде жүзеге асырылып, тиімділігі мен ауқымын кеңейту әлеуетін растады, - дейді Ғ. Байтұрсынов.
Бұған дейін жасанды интеллектіні дамыту комитетінің басшысы ЖИ-ді енгізу жаппай жұмыссыздыққа алып келмей ме деген сауалға жауап берді.
Сондай-ақ елімізде оқушыдан мемлекеттік қызметшіге дейін жасанды интеллектіні меңгеретінін және оның маңызы туралы жазған едік.
Айта кетейік, алдағы бес жылда 1 млн-ға жуық қазақстандық жасанды интеллектіні меңгереді.
Еске салайық, Қазақстан Chat GPT секілді өз жасанды интеллектісін жасап шығармақ. Ақылды жүйе KazLLM деп аталады.
