Қазақстанда «Кодтау сағаты» бастамасына 30 мыңнан астам адам қатысады

АСТАНА. ҚазАқпарат - 7-13 желтоқсан аралығында Қазақстанда халықаралық информатиканы үйрену аптасы аясында «Кодтау сағаты» бастамасы өтеді. Қазақстан ТМД ішінде «Кодтау сағаты» қозғалысына қосылып, үкімет тарапынан (ҚР Білім және ғылым министрлігі мен Инвестициялар және Даму Министрлігі) қолдау көрсетілген алғашқылардың бірі болып табылады.

ҚР БҒМ баспасөз қызметінен хабарлағандай, «Кодтау сағаты» бастамасы - бағдарламалаудың қызықты әрі оңай екендігін көрсететін тиімді жол. 2014 пен 2015 жылдың басында шамамен 134 миллион адам мұндай бастамаға қатысты, оның 15 миллионы - АҚШ-та, ал 7,5 миллионы - Ресейде. Бұл бастама бағдарламалаудың қызық еместігі, немесе «қыз балаларға арналмағандығы», не өте қиын пән екендігі туралы сыңаржақ пікірлерді сейілтеді. Бастама мақсаты - жастардың бағдарламалау мен информатикаға деген қызығушылығын арттыру, сонымен қатар жастар алдында ІТ мамандығының беделін көтеру.

«Кодтау сағаты» Қазақстанда бұрын-соңды өткен ІТ саласындағы білім беру шаралар ішінде ең ірісі болады. Бұл бастамаға оқушылардың рекордтық саны - 30 мыңнан астам адам қатысады деп күтілуде. Олардың әрқайсысы бағдарламалау дағдыларын үйренуге бірегей мүмкіндік алады және ІТ саласындағы алғашқы қадамдарын жасайды. Информатика пәні бойынша ашық сабақ Қазақстанның барлық мектептерінде 3-7 сынып оқушыларына өткізілуіне ұсыныс жасалады.

«Кодтау сағаты» информатиканың арнайы сабағында мұғалім оқушыларға бағдарламаушының не істейтіні туралы айтып береді және балалармен бірге олардың бірінші код жолдарын жазады.