Қазақстанда көмір қымбаттауы мүмкін

НҰР-СҰЛТАН. ҚазАқпарат – ҚР Индустрия және инфрақұрылымдық даму министрлігі Индустриялық даму комитетінің төрағасы Ілияс Оспанов ел өңірлеріндегі көмір бағасы туралы айтып берді, деп хабарлайды ҚазАқпарат тілшісі.

«Ауа райының суытуымен бірге көмірге сұраныс та артып келеді. Шамамен қыркүйектің аяғы мен қазан айының басында күн суытады деген болжам бар. Тиісінше, көмір бағасы да өсуі мүмкін», - деді Ілияс Оспанов Орталық коммуникациялар қызметінде өткен баспасөз мәслихатында.

Дегенмен спикер көмірдің 1,5-2 есеге дейін күрт қымбаттамайтынын ескертті. Қандай да бір өңір көмір өндіретін орыннан алыс орналасса, қатты отынның құны да арта түспек.

«Қазіргі уақытта бір тонна көмірдің орташа бағасы 9-дан 14 мың теңгеге дейін жетеді. Кей облыстар мысалы, Қарағанды, Павлодар облыстары көмірді разъездерден тікелей алғандықтан 7-8 мың теңгеге алады», - деді Ілияс Оспанов.

Комитет төрағасының айтуынша, оңтүстік өңірлерде көмір қымбатқа сатылады.

Бұған дейін Ілияс Оспанов Қазақстанда жылыту маусымына дайындық қалай жүріп жатқанын айтқан еді.