Қазақстанда мажар банктерінің филиалы ашылады
АСТАНА. KAZINFORM – Былтыр Қазақстан мен Мажарстан арасындағы тауар айналымы 4,4% артып, 200 млн доллардан асты. Екі ел арасындағы экономикалық байланыс туралы ҚР Премьер-министрінің орынбасары – Сыртқы істер министрі Мұрат Нұртілеу мәлімдеді.
- Петер Сийярто мырзамен нақты әрі нәтижелі келіссөздер өткізіп, бірқатар уағдаластыққа қол жеткіздік. Соның ішінде, екіжақты сауда көлемін ұлғайтуға және инвестициялық кооперацияны дамытуға аса мән берілді. Былтыр тауар айналымы 4,4% артып, 200 млн доллардан асты. Келешекте бұл көрсеткішті 1 млрд долларға жеткізу жоспарда бар. 20 жылда еліміздің экономикасына Мажарстаннан 370 млн доллардан астам тікелей инвестиция тартылды, - деді Мұрат Нұртілеу БАҚ өкілдерінің алдында мәлімдеме жасай отырып.
Министрдің мәлімдеуінше, қазір елімізде 700 млн долларды құрайтын 16 ортақ жоба жүзеге асырылып жатыр.
- Бүгінде мажарлық «MOL» мұнай-газ компаниясы 200 млн доллар инвестиция салып, Батыс Қазақстанда ірі газ конденсаты кен орнын игеруде. «Globalia» кәсіпорны күн энергиясының үш станциясын, ал «UBM» холдингі Алматыда, Қарағанды және Қостанай облыстарында жем шығаратын үш зауытты іске қоспақ. Осы жетістіктермен тоқтап қалмай, ынтымақтастықты одан әрі екпінді түрде жалғастыру үшін магистралды жаңа бағыттарды да айқындадық. Атап айтқанда, Қазақстанда мажар банктерінің филиалдарын ашу, Будапештте мультимодальды терминал салу, Мажарстанға экспортталатын мұнай және мұнай өнімдерін ұлғайту, сондай-ақ уран және сирек кездесетін минералдарды игеру перспективасына сенімім мол, - деді ол.
Оның айтуынша, екі елдің стратегиялық серіктестігі – Шығыс пен Батысты жалғап, сауда мен инвестицияның жаңа көкжиектерін ашатын алтын көпір.
Айта кетейік, бүгін Мажарстанның Сыртқы экономикалық байланыстар және сыртқы істер министрі Петер Сийярто елордаға ресми сапармен келді.
Белгілі болғандай Мажарстанның президенті Тамаш Шуйок және Парламент спикері Ласло Кевердің Қазақстанға ресми сапарпен келеді.
Одан бөлек, ҚР Премьер-министрінің орынбасары — Сыртқы істер министрі Мұрат Нұртілеу Таяу Шығыстағы жағдайға алаңдаушылық танытты.
Сондай- ақ Мұрат Нұртілеу Ресей мен Украина арасындағы қақтығыстың оңайлықпен шешілмейтінін айтты.
