Қазақстанда оқушыларға арналған жаңа 5 сауықтыру демалыс лагері ашылады - Білім министрі
АСТАНА. 21 мамыр. ҚазАқпарат - Қазақстанда 755 орынға есептелген 5 жаңа сауықтыру демалыс нысаны ашылады.
Бұл туралы бүгін Үкімет отырысында 2013 жылғы жазғы маусымда оқушыларды сауықтыру, олардың бос уақытын, демалысын ұйымдастыру бойынша баяндама жасаған ҚР Білім және ғылым министрі Бақытжан Жұмағұлов айтты.
«Республиканың 7 өңірінде мектеп жанындағы лагерьлер саны көбейді. Жалпы, маусым басталу қарсаңында республикада 775 орынға есептелген 5 атап айтқанда, Қостанайда - 1, Павлодарда - 1, Батыс Қазақстанда 3 сауықтыру демалыс нысаны ашылады»,-деді ол.
Министрдің атап өтуінше, жекеменшік 221 лагерьдің 82-сі жекеменшік- мемлекеттік әріптестік аясында жұмыс істейтін болады. Сондай-ақ, тұрғындардың әлеуметтік қорғалмаған бөлігінен шыққан балаларға ерекше назар аударылады.
«Ағымдағы жылы аз қамтылған және көпбалалы отбасыларда тұратын 680 мың бала, мүгедек балалар мен жетім балалардың 450-ге жуығы немесе 65,4 пайызы жазғы демалыспен қамтылады»,-деді Б. Жұмағұлов.
