Қазақстанда полицейлер қандай себеппен жиі жұмыстан шығарылады
АСТАНА. ҚазАқпарат - Ағымдағы жылдың басынан бері ел азаматтарының өтініші бойынша 4 полиция қызметкері қызметінен кетті. Бұл туралы бүгін Үкімет үйінде «100 нақты қадам» Ұлт жоспарының іске асырылу барысына арналған баспасөз мәслихатында ҚР Ішкі істер вице-министрі Ерлан Тұрғымбаев мәлім етті, деп хабарлайды ҚазАқпарат.
Оның айтуынша, ҚР Ішкі істер министрлігі жанындағы қоғамдық кеңес азаматтардың өтініштерін, оның ішінде қызметкерлердің әдеп іс-әрекетіне қатысты шағымдарын қарайды. Ағымдағы жылдың басынан бері кеңеске 21 өтініш түссе, оның екеуі қызметкерлердің жалпы қабылданған жүріс-тұрыс ережесін бұзу мәселесіне қатысты болды.
«Мұндай жайт өңірлерде де қалыптасқан. Ішкі істер департаменті жанындағы консультативтік-кеңесу орындары полиция қызметкерлеріне қатысты 20 өтінішті қарады. Қарау нәтижесінде 12 лауазымды тұлға тәртіптік жазаға тартылып, 4 қызметкер ішкі істер органдарынан шығарылды», - деді Тұрғымбаев.
Вице-министрдің сөзіне қарағанда, құқық қорғау органдарының қызметкерлеріне қатысты азаматтардың шағымдары мен арыздарын қарау бөлігіндегі жұмыстар қатаңдатылады.
«Қызмет бабын теріс пайдалану, билігін асыра қолдану және дөрекілік - бұл бізге түсетін шағымдардың негізгі үш критерийі», - деді ол.
