Қазақстанда темекі тартатын ерлер – 34%, әйелдер – 5%

АСТАНА. KAZINFORM – 2025 жылы Қазақстанда темекі шегетін ересектердің үлесі 17,5 пайызды құрап, бір жыл бұрынғы көрсеткішпен салыстырғанда төмендегені байқалды. Бұл туралы Ұлттық статистика бюросы хабарлады.

Бюроның мәліметінше, биылғы қаңтарда елімізде темекі тұтыну бойынша кезекті жыл сайынғы зерттеу жүргізілді. Сауалнама республиканың барлық өңірі мен үш ірі қаласы — Астана, Алматы және Шымкентте өткізіліп, оған 15 жастан асқан 12 000 үй шаруашылығының бір мүшесі қатысты.

Нәтижелер:

• Халықтың 17,5%-ы темекі шегеді (2024 жылы — 20,7%);
• Ауылдық жерлерде — 19,1%, қалаларда — 16,7%;
• Темекі тартушылардың 93,8%-ы өнеркәсіптік дайын өнімді пайдаланады;
• Ер адамдар арасында темекі шегу көрсеткіші — 34%, әйелдер арасында — 5%.

Ұлттық статистика бюросы бұл зерттеуді ҚР Денсаулық сақтау министрлігінің ұсынысы бойынша Дүниежүзілік денсаулық сақтау ұйымының (ДДСҰ) GATS халықаралық әдістемесі негізінде 2020 жылдан бері тұрақты түрде жүргізіп келеді.

- Бұл деректер темекіге қарсы мемлекеттік саясат пен алдын алу шараларының белгілі бір нәтижелер бере бастағанын көрсетеді, - делінген ақпаратта.

Айта кетейік, Қазақстанда темекі бағасы өзгерді.