Қазақстанда теракт ұйымдастырғысы келгендердің қатарында Қырғызстан азаматы болғаны анықталды

АСТАНА. ҚазАқпарат - Қырғызстанның Сыртқы істер министрлігі Қазақстанда теракт ұйымдастырмақ болған лаңкестік топтың қатарында Қырғызстан азаматы болғанын растады.

«Қырғыстан СІМ хабарлайды, Алматы облысы Қарасай ауданы Іргелі ауылында 18 тамызда Ұлттық қауіпсіздік комитетінің Алматы облысы бойынша департаменті қызметкерлері жүргізген жедел-алдын алу шаралары барысында ҚР ҚК 257-бабы 1-бөлімі бойынша (Лаңкестік топты құру және оған басшылық ету, оның қызметіне белсенді қатысу) 15.02.1976 жылы Қырғыз Республикасы Ош облысы Үзген ауданы, Үзген ауылында туған Қырғыз Республикасының азаматы С.П., ұсталды», - делінген Қырғыз СІМ таратқан хабарламада.
Бұның алдында хабарлағанымыздай, 2016 жылы 18 тамызда Ұлттық қауіпсіздік комитетінің Алматы облысы бойынша департаменті ҚР аумағында бірқатар лаңкестік актілер ұйымдастырмақ болған 4 адамнан құралған лаңкестік топты құрықтаған болатын.