Қазақстанда тергеу жүргізетін арнайы кабинеттер жасақталмақ
АСТАНА. ҚазАқпарат - Күдіктілерді тергейтін арнайы кабинеттер бейне түсіріліммен жабдықталмақ. Бұндай қадам тергеу барысында адамды азаптау мен жауапты мәжбүрлеп алу жағдайларына тосқауыл қою мақсатында енгізілмек. Осы ретте бұндай ұсынысты бүгін алқа мәжілісінде ҚР Бас прокурорының орынбасары Ерлік Кененбаев айтты, деп хабарлайды ҚазАқпарат.
«Жыл сайын Қазақстанда қылмыстық процестерде заң бұзушылықтар азаймай тұр. Азаптауға қатысты шағымдар көп. Куәгерлерді көндіру немесе қорқыту мүмкіндігі бар. Адами факторға тосқауыл қойып, жаңа технологияларды батыл енгузі керек. Барлық үрдісті бейне таспаға жазуды ұсынамыз. Тергеу органдарында жауап алатын арнайы кабинеттерді құрудың уақыты жетті. Бұл әлемдік тәжірибе. Ондағы тергеу амалдары ашық жүргізіледі, осы ретте кабинеттер бейнекамералармен жабдықталған. Таспадағы мәліметтер хаттамаға тіркеледі», - деді Кененбаев.
Осы орайда ведомство заңнамалық түзетулердің тиісті пакетін сәуір айында ұсынуды жоспарлап отыр.
