Қазақстанда тұрмысы төмен отбасылардан шыққан оқушыларға көмек көрсету қағидалары өзгерді

АСТАНА. KAZINFORM - Үкіметтің 2025 жылғы 8 мамырдағы қаулысына сәйкес, тұрмысы төмен отбасылардан шыққан білім алушыларға қаржылай және материалдық көмек көрсету тәртібі жаңартылды.

Құжатқа сәйкес, көмек келесі санаттағы балаларға көрсетіледі: 

• мемлекеттік атаулы әлеуметтік көмек (АӘК) алуға құқығы бар отбасылардан шыққан балалар; 
• АӘК алмайтын, бірақ жан басына шаққандағы табысы ең төменгі күнкөріс деңгейінен аз отбасылардағы балалар;
• отбасында тұратын жетім балалар мен ата–анасының қамқорлығынсыз қалған балалар;
• төтенше жағдай нәтижесінде жедел көмек қажет ететін отбасылардан шыққан балалар;
• сондай-ақ білім беру ұйымдарының алқалық органдары айқындайтын өзге де санаттағы білім алушылар мен тәрбиеленушілер.

Бөлінген бюджет қаражаты мынадай мақсаттарға бағытталады:

• киім, аяқ киім мен оқу құралдарын сатып алу;
• білім беру ұйымында бір реттік ыстық тамақ ұйымдастыру;
• қаржылай көмек көрсету;
• оқушылардың мәдени-көпшілік және спорттық іс-шараларға қатысуын қамтамасыз ету;
• жалпы білім беретін пәндер бойынша қосымша сабақтар ұйымдастыру.

Сондай-ақ, толығырақ ақпаратпен қаулы мәтінінен танысуға болады. 

Бұған дейін, Үкіметте кәмелетке толмағандардың қауіпсіздігін қамтамасыз ету, олардың құқықтарын қорғау және құқық бұзушылықтың алдын алу мәселелері бойынша кеңес өткенін хабарлағанбыз.