Қазақстанда ұрланған жеке деректердің реестрі құрылмақ

АСТАНА. KAZINFORM – Жүйе қазақстандықтардың жеке деректерінің таралып кеткен-кетпегенін көрсетеді.

Елімізде жоғалған, ұрланған жеке деректердің реестрін құру жоспары туралы Цифрлық даму, инновациялар және аэроғарыш өнеркәсібі министрлігінің Ақпараттық қауіпсіздік комитетінің төрағасы Руслан Әбдіхалықов мәлім етті.

- Әрбір азамат жеке деректерін енгізе алатын база құрамыз. Мысалы, тегі, аты, телефон нөмірі, электрондық пошта мекенжайы тағы сол сияқты. Жүйе осы деректер бойынша әлемде қандай да бір ақпараттың тарап кету жағдайын көрсетеді, – деді Руслан Әбдіхалықов орталық коммуникациялар қызметі алаңында өткен баспасөз мәслихатында.

Одан әрі цифрлық министрлік өкілі жаңа жүйенің артық тұстарына тоқталды.

- Алдымен бізге реттеуші орган ретінде, азаматтарды ақпараттандыру функциясын орындау үшін маңызды. Егер біз қандай да бір деректердің таралып кеткенін анықтасақ, оны халыққа жеткізу біздің міндет. Ал азаматтарға қанша және қандай мәліметі жоғалғанын білуге көмектеседі. Егер сіздің жеке деректеріңізді бөгде адам пайдаланса, мәліметтің банк қызметкерлері немесе мемлекеттік органдар арқылы емес, заңсыз таралып кеткенін біле аласыз, – деп толықтырды спикер.

Айта кетсек, елімізде жеке деректер жинайтын компаниялардан киберсақтандыру талап етіледі.