Қазақстанда ұсақтау шарларын өндіретін зауыт салынады
АСТАНА. KAZINFORM – Кәсіпорын 2028 жылы Талдықорғанда жұмысын бастайды деп жоспарлануда. Оның өндірістік қуаттылығы жылына 150 мың тонна өнім.
Астанада KAZ Minerals Тобы мен чилилік ME Elecmetal компаниясы арасында оффтейк-келісімшартқа қол қойылды.
Жобаға тартылатын инвестиция құны шамамен 85 млн АҚШ доллары. Бастама кезегінде 100 жаңа жұмыс орнын ашып, өңірдің өндірістік әлеуетін дамытуға қомақты үлес қосады және мемлекеттік бюджетке түсетін түсімді арттырады деп күтілуде.
Тау-кен өнеркәсібінде ұсақтаушы шарларды шығару ісінің маңызы жоғары. KAZ Minerals Тобы жыл сайын аталған өнімнің 70 мың тоннасын пайдалану үшін шамамен 100 млн доллар жұмсайды. Қазақстанда мұндай сападағы шарлардың болмауы себепті компания ұсақтаушы шарлар өндірісінің әлемдік көшбасшысы — ME Elecmetal өнімін тұтынады.
«KAZ Minerals Management» ЖШС басқарма төрағасы Эльдар Мамедов ME Elecmetal компаниясымен әріптестік жаңа мүмкіндіктерге жол ашатынына тоқталды.
— KAZ Minerals Тобы әрқашан ел басшылығының индустриялық саясатына сәйкес келетін өндірістік циклдің барынша тиімділігіне бағытталған үздік шешімдерді енгізуге ұмтылады. Сапалы ұсақтау шарларын пайдалану тау-кен байыту кешендерінің өнімділігіне әсер ететін негізгі фактор. 2023 жылы біз әртүрлі жеткізушілердің өнім үлгілерін олардың сипаттамаларын бұрын қолданылған материалдармен салыстыра отырып, ауқымды сынақтан өткіздік. Бағалаудың негізгі критерийлері шарларды тұтыну, ұнтақталған кеннің бір тоннасына энергия тұтыну, шарлардың бөлінуіне байланысты Өндіріс аялдамаларын азайту, металл өндіруді арттыру болды. ME Elecmetal өнімі барлық көрсеткіш бойынша үздік нәтиже берді, — деді ол.
Оның айтуынша, оффтейк-келісімшартты бекіту — жай ғана іскерлік келісім емес, елдің тау-кен өндірісін дамыту және оның әлемдік нарықтағы бәсекелестікке қабілеттілігін арттыруға бағытталған стратегиялық әріптестік болып саналады. Зауыт құрылысы сапалы өнімге сұранысты қанағаттандырудан бөлек, жергілікті өндірісті дамытуға, жаңа жұмыс орындарын ашуға, жаңа технологияларды іске қосуға мүмкіндік береді.
КAZ Minerals – Қазақстандағы заманауи, ірі ауқымды, азшығынды карьерлік типтегі тау-кен өндірісін дамытуға бағытталған, өсу әлеуеті зор мыс өндіруші компания. Топ операциялық іс-қызметін Абай облысында орналасқан Ақтоғай мыс кенішінде, Орлов кеніші мен фабрикасында және Павлодар облысындағы Бозшакөл кенішінде, ШҚОд-ағы екі кеніш пен кен байыту фабрикасында, Қырғызстандағы Бозымшақ мыс-алтын кенішінде жүргізеді.
