Қазақстанда үйді жөндеудің бағасы қай өңірде ең қымбат

ӨСКЕМЕН. KAZINFORM – Үйдегі жөндеу жұмыстарының құны өңірге ғана емес, клиенттің талап-талғамы мен қалтасының қалыңдығына тікелей байланысты. Kazinform тілшісі ең қолайлы бағалар Қазақстанның қай жерлерінде екендігін анықтап көрді.

Үйге жөндеу жүргізер алдында қиялдағы қалаулар мен қаржылай мүмкіндіктің арасындағы тепе-теңдікті сақтай білу қажет. Әр адамның шешім қабылдарда ақылы алтыға, ойы онға бөлінеді. Біреулер дизайнерлік жиһаздары көздің жауын алатын стильді лофт интерьерін таңдаса, енді біреулерге ескі тұсқағаздарды ауыстырып, құбырларды жаңартудың өзі жеткілікті. Сондықтан жөндеу жұмыстарына кіріспес бұрын шығындарды дұрыс есептеу үшін көкейдегі мақсатты анықтап алу маңызды.

Ел бойынша жөндеу жұмыстарының бағасы әр өңірде өзгеше. Сонымен қатар қандай жөндеу керектігіне байланысты да құбылып тұрады.

Негізінен жөндеуді шартты түрде екі санатқа бөлуге болады – күрделі және косметикалық. Бірінші жағдайда көбінесе қабырғалар мен еден тегістеледі, барлық коммуникация ауыстырылады, ескі жабындар алынып, жаңалары орнатылады, есіктер мен терезелер ауыстырылады немесе қайта жоспарлау жүргізіледі. Жалпы, тұрғын үй толықтай жаңартылып шығады. Мұндай күрделі жұмыстың құнын бір қаланың өзінде салыстырып шығудың өзі оңай шаруа емес.

Күрделі жөндеуге қарағанда, косметикалық жөндеу әдетте қалтаға салмақ салмайды. Қабырғаларды бояу немесе тұсқағаз жапсыру, линолеумды ауыстыру, жарық мен розеткаларды жаңарту көп шығын емес. Бірақ үйдің кескін-келбетін едәуір жақсартады.

Енді әр қалада жөндеу жұмыстары қаншалықты қымбатқа түсетінін есептеп көрейік. Біз 40 м² көлемді бір бөлмелі пәтерге ең арзан косметикалық жөндеу жасаймыз деп алайық. Жатын бөлме қабырғаларына тұсқағаз жапсырамыз, қалғанын бояймыз (қиын есептеулерді айналып өтіп, стандартты төбе биіктігін ескере отырып, бізге 5 рулон тұсқағаз және 5 литр бояу қажет деп алдық). 5 розетка мен 5 жарық қосқышты ауыстырамыз. Сондай-ақ 4 метрлік ені бар 7 метр линолеум сатып алу керек (бүкіл аумақты қамтудың қажеті жоқ, 28 м² жеткілікті). Қосымша қажет заттар: 5 литр топырақ қоспасы (тұсқағазға арналған), 10 келі шпаклевка – бояу алдында қабырғаларды тегістеу үшін. Тұсқағаз желімін де ұмытпауымыз қажет. 1 келі алсақ жеткілікті.

Жөндеуді өзіміз жасамаймыз. Кәсіби мамандарды шақырамыз. Пәтер кішкентай болғандықтан, сапалы нәтижеге қол жеткізу үшін қосымша шығындануға болады. Әрине, шеберлердің жұмысына төленетін баға да өңірлерде айтарлықтай өзгеше болуы мүмкін. Сондықтан біз ең арзан нұсқаны таңдауды ұйғардық.

Бірқатар шығынды бірдей бағада есептедік. Мәселен, 5 литр топырақ қоспасы – 2500 теңге, екі қаптама шпаклевка – 2000 теңге, екі қаптама тұсқағаз желімі – 2000 теңге, 40 метр плинтус – 8000 теңге, 10 розетка мен қосқыш – 5000 теңге. Барлығы: 17 500 теңге.

Енді бұл мысалды егжей-тегжейлі қарастырып, өңірлерге сәйкес бағалап көрейік. Астанада әртүрлі жарнамалық сайттарда шеберлердің қызметі үшін келесі бағалар ұсынылған: тұсқағаз жапсыру – 880 теңге м² (қызығы, Қазақстанда кейбір шеберлер бағаны шаршы метрге қарай есептесе, басқалары рулон бойынша қояды, бірақ орташа есеппен баға осы аралықта), қабырғаларды тегістеп, бояу – 1300 теңге м², розеткалар мен қосқыштарды ауыстыру – бір нүктеге 1000 теңгеден.

Біз қабырғаларды 20 м² жапсырып, 20 м² бояймыз, сондықтан тұсқағаз үшін 17 600 теңге, бояу үшін 26 000 теңге кетеді. Электриктің жұмысына 10 000 теңге жұмсаймыз (әр нүкте – 1000 теңге, барлығы 10 нүкте). Ең арзан тұсқағаздың бағасы 8000 теңгеден басталады, 5 рулон қажет, сондықтан 40 000 теңге кетеді. Бояу 1500 теңгеден, 5 литр қажет, барлығы 7500 теңге болады. Астанада линолеум 4000 теңгеден басталады, сондықтан 112 000 теңге қажет.

Сондағы шығын - 213 100 теңге. Бұған біздің әуел баста бірдей бағада есептеген шығынды (17 500 теңге) қосамыз. Нәтижесінде, 230 600 теңгеге шағын пәтерге жөндеу жасай аламыз.

Астана елімізде үйдегі жөндеу жұмыстары ең қымбат қала емес. Бірінші орынды Алматы алып тұр. Мұнда осындай қарапайым жөндеу кемінде 290 500 теңгеге шығады.

Қалған қалалардағы бағалар айтарлықтай ерекшеленбейді. Ьірақ оларды үш шартты санатқа бөлуге болады.

Қымбат қалалар: Павлодар (222 500 теңге), Орал (216 000 теңге), Тараз (204 500 теңге), Шымкент (216 500 теңге).

Орташа бағалар: Семей, Қонаев, Қостанай, Қарағанды, Түркістан, Талдықорған (193 500 – 199 500 теңге аралығында).

Ең арзан жөндеу жұмыстары келесі қалаларда:

• Өскемен – 188 500 теңге

• Петропавл – 186 500 теңге

• Атырау – 183 000 теңге

• Ақтау, Жезқазған, Ақтөбе, Қызылорда – 176 500 теңге

• Ең арзан қала – Көкшетау: 163 000 теңгеден басталады.

160-200 мың теңге – жөндеуді ең арзанға жасағандағы бағалар. Егер қымбаттау тұсқағазды таңдап, тәжірибелі шеберлерді жалдасаңыз немесе қосымша тағы да элементтер қоссақ, бұл баға кемінде 5 есеге дейін көбейеді.

Статистикаға сүйенсек, жөндеу бағасының жартысына жуығы линолеумға кетеді. Егер оны ауыстырмасаңыз, жөндеу құнын 50%-ға дейін азайтуға болады. Сондай-ақ мамандарды жалдамай, жөндеуді өзіңіз жасасаңыз, тағы 30%-ға дейін үнемдей аласыз.

Жыл сайын үйдегі жөндеу бағасы шамамен 10%-ға өсіп отырады. Сондықтан отандық материалдарды таңдап, бәрін мұқият есептеу арқылы 30-35% қаражатты үнемдеуге әсте болады.

Еске салсақ, бұған дейін Қазақстанда сүндетке отырғызу қызметі қанша тұратындығын жазғанбыз.