Қазақстанда заңды тұлғаларға мемлекеттік органдардың атауларын пайдалануға тыйым салынды
АСТАНА. KAZINFORM – Әділет министрі заңды тұлғаларды мемлекеттік тіркеу және филиалдар мен өкілдіктерді есептік тіркеу саласындағы мемлекеттік қызметтерді көрсету қағидаларына өзгерістер енгізді.
Жаңа өзгерістерге сәйкес, мемлекеттік орган, мемлекеттік мекеме немесе квазимемлекеттік сектор субъектісі болып табылмайтын заңды тұлғаларды тіркеу кезінде олардың атауында:
– Қазақстан Республикасының мемлекеттік органдарының, мемлекеттік мекемелерінің және квазимемлекеттік сектор субъектілерінің ресми атауларын;
– мемлекеттік органдардың, мемлекеттік мекемелердің және квазимемлекеттік сектор субъектілерінің атауларына ұқсас қысқартуларды, аббревиатураларды, туынды сөздерді және шатастыруға әкелетін өзге де белгілерді қолдануға жол берілмейді.
Құжат 2026 жылғы 2 маусымнан бастап қолданысқа енгізіледі.
Айта кетейік, мемлекеттің қатысуынсыз құрылған академиялардың атауларында «ұлттық» сөзі болмауы керек.
