Қазақстанда жаңа тау-кен және энергетикалық жобалар іске асырылмақ
АСТАНА. KAZINFORM — Қазақстан Республикасы Премьер-министрінің бірінші орынбасары Нұрлыбек Нәлібаев негізгі инвестициялық жобаларды іске асыру мәселелері бойынша кеңес өткізді. Бұл туралы Үкіметтің баспасөз қызметі мәлім етті.
Кеңес барысында «Айдарлы» жобасын, Жетісу облысының Кербұлақ ауданында тау-кен байыту комбинатын салу, Көксай кен орнын игеру жөніндегі инвестициялық жобаны, «Новоджамбульский фосфорный завод» ЖШС, «Қазфосфат» ЖШС жобаларын, Курчатов қаласында қуаты 700 МВт конденсациялық электр стансасын, Жезқазған ЖЭО-да қуаты 75 МВт бу-газ қондырғысын салу мәселелері қаралды.
Нұрлыбек Нәлібаев өңірлер мен өнеркәсіпті дамытуға бағытталған жобаларды табысты іске асыру үшін Үкімет тарапынан жан-жақты қолдау көрсету жалғасатынын растады.
Жиын барысында жобаларды іске асыруға әсер ететін мәселелерді уақтылы шешу үшін мемлекеттік органдар мен компаниялардың үйлестірілген жұмысын қамтамасыз ету қажеттілігі атап өтілді.
Кеңес қорытындысы бойынша мүдделі мемлекеттік органдар мен ұйымдарға қаралған инвестициялық жобалар жөніндегі бастамаларды пысықтау бойынша бірқатар тапсырмалар берілді.
Айта кетейік, бұған дейін Премьер-министрдің бірінші орынбасары Нұрлыбек Нәлібаевтың төрағалығымен автожол саласы мәселелері жөнінде кеңес өтті.
