Қазақстанда жасалған: «Тұлпар-Тальго» биыл 150-ден астам вагон шығарады

АСТАНА. ҚазАқпарат - Биыл «Тұлпар-Тальго» 150-ден астам вагон шығарады, деп хабарлады Астана қаласы әкімдігінің баспасөз қызметінен.«Тұлпар-Тальго» ЖШС зауытының бас энергетигі Виктор Наумкиннің айтуынша, Биыл зауыт «тар қорап» жобасын аяқтағалы отыр. «Бұл жоба бойынша шанақтың ені 2950 мм құрайды. Жолаушылардың өтінішімен, орын көп болуы үшін вагон қораптарының ені кеңірек болады», - деді ол.

Қазақстандық жедел теміржол вагондарын шығаратын «Тұлпар-Тальго» зауыты 2011 жылдың желтоқсанында ашылған болатын. Зауыт халықаралық сапа стандарттарына, өндіріс процессінің нәтижелілігіне сай жобаланып, салынған. Бүгінде «Тұлпар-Тальго» ТМД елдерінде теңдесі жоқ зауыт. Мұндай кәсіпорынның құрылысы мемлекеттік инновациялық-индустриялық даму бағдарламасы аясында жүзеге асырылды. Ашылған соң бір жылдан кейін 2012 жылдың маусымында «Алматы - Петропавл» бағытындағы алғашқы вагон құрамы пайдалануға берілді. Қазірде «Тұлпар-Тальго» пойыздары «Астана - Ақтөбе», «Астана - Атырау» және «Астана - Семей» бағыттарында жолға шықты. Бүгінгі таңда зауытта 292 маман қызмет атқарады. Кәсіпорын толық қуаттылықпен жұмыс істегенде қызметкерлер саны 360 жететін болады. «Тұлпар-Тальго» пойызының түзу ғана емес, қисық теміржолдардағы ең жоғары жылдамдығы 200 км/сағ екенін біреу білсе, біреу білмейді. Қазақстандық жаңа пойыздардың ерекшелігі - қозғалыс қауіпсіздігі мен жайлылық. - Біздің зауытқа Иран, Грузия, Балтық жағалауы елдерінің өкілдері келіп, вагон құрамдарын сатып алуға ниеттерін білдірді. Пойыздардың бір ерекшелігі - олар ені басқа жолға тоқтамастан өте алады. Ол жылдамдықты 5 км/сағ дейін төмендетіп, жолды автоматты түрде ауыстырады, - деді Виктор Наумкин.