Қазақстанда жыныс ауыстыру операциясы тіркелген жоқ – ҚР ДСМ

АСТАНА. KAZINFORM – Бұл туралы ҚР Денсаулық сақтау министрлігі ресми жолданған сауалға жауабында айтты.

- Бүгінгі таңда медициналық ақпараттық жүйе арқылы қалыптасқан ресми статистика бойынша елімізде жыныс ауыстыру операциясы тіркелген жоқ,- деп мәлімдеді ведомство өкілдері.

Сонымен қатар ҚР Денсаулық сақтау министрі міндетін атқарушының 2020 жылдың 30 қазанындағы № ҚР ДСМ-170/2020 «Міндетті әлеуметтік медициналық сақтандыру жүйесіндегі кепілдендірілген тегін медициналық көмек аясында көрсетілетін медициналық қызметтердің тарифтерін бекіту туралы» бұйрығына сәйкес, жынысты ауыстыру бойынша пластикалық операцияларды жүзеге асыру медициналық қызметі тарифтер тізімінде жоқ.

Осыған дейін Мәжіліс депутаты Магеррам Магеррамов бастаған бірқатар халық қалаулысы елімізде жыныс ауыстыруға заңмен тыйым салуды ұсынғаны туралы жаздық.