Қазақстанда жол қозғалысы қауіпсіздігі саласындағы әкімшілік жауапкершілік күшейтілді
АСТАНА. ҚазАқпарат - Еліміздің заңнамасындағы жол қозғалысы қауіпсіздігі саласына қатысты өзгерістер жолдардағы ахуалды тұрақтандырып, жол-көлік оқиғалары мен олардан зардап шегетіндердің санын азайтады, деп хабарлады ҚР ІІМ Әкімшілік полиция комитетінен.
Жол қозғалысына қатысушылардың кінәсінен қаза тауып және зардап шегу фактілері бойынша құқық бұзушылықтың 8 құрамы бойынша айыппұл санкциялары өсті. Автокөліктерді мас күйінде жүргізгендігі үшін жауапкершілік күшейтіледі. Жылдамдықты асырғаны, қиылыстар немесе жолдың кесіп өту бөлігінде жүру ережесін бұзғаны, көлікті жол жүру ережелеріне қайшы қойғаны, сондай-ақ көлік жүргізу кезінде телефон немесе радиостансаны пайдаланғаны үшін айыппұлдар сомасы өсті.
«Жолдың қарсы бағытына шығып кеткені, сондай-ақ полиция қызметкерінің автокөлікті тоқтату туралы заңды талабын орындамағаны үшін автокөлік құралын жүргізу куәлігінен айыру енгізілді», - делінген хабарламада.
Ведомствоның атап өтуінше, айыппұл сомасын белгілеуде жолдағы апаттардың төмен деңгейі тіркелген елдердің халықаралық тәжірибесі ескерілген.
Айта кетерлігі, 2012-2013 жылдары аралығында Қазақстанда жол қозғалысы ережелерінің бұзылуы күрт өсіп кеткені байқалды. Мәселен, 2013 жылы бақылау-өлшеу техникалық құралдары түсіріп, тіркеген жол қозғалысы ережесінің бұзылуы шамамен - 90, оқиғалар 65, жарақат алғандар саны 71 пайызға өскен.
